İQTİSADİYYAT
Tanınmış alim və dövlət xadimi Sabit Orucovun 100 illik yubileyi qeyd olunmuşdur
Bakı, 31 may (AZƏRTAC). Mayın 31-də “Gülüstan” sarayında neft və qaz sənayesi sahəsində tanınmış alim və dövlət xadimi, sabiq SSRİ qaz sənayesi naziri, Sosialist Əməyi Qəhrəmanı, Lenin və Dövlət mükafatları laureatı, Azərbaycan Elmlər Akademiyasının müxbir üzvü, texnika elmləri doktoru, professor Sabit Atababa oğlu Orucovun 100 illik yubileyinə həsr olunmuş tədbir keçirilmişdir.
AZƏRTAC xəbər verir ki, tədbiri açan sənaye və energetika naziri Natiq Əliyev demişdir ki, Azərbaycan Prezidentinin Sabit Orucovun 100 illik yubileyinin keçirilməsi haqqında 2011-ci il sentyabrın 20-də imzaladığı Sərəncam əslində bütün neftçilərin əməyinə verilən yüksək qiymətin ifadəsidir. Neft və qaz sənayesində çalışaraq Sovet İttifaqı kimi böyük bir dövlətin naziri vəzifəsinə yüksələn S.Orucov Azərbaycanın adını daim uca tutmuşdur.
Azərbaycan Respublikası Dövlət Neft Şirkətinin 1-ci vitse prezidenti Xoşbəxt Yusifzadə bildirmişdir ki, S.Orucov 1912-ci ildə Bakının Novxanı kəndində kasıb bir ailədə dünyaya gəlmişdir. Neftçi olmaq arzusu ilə S.Orucov 1930-cu ildə Azərbaycan Sənaye İnstitutuna daxil olur. Ali məktəbi bitirdikdən sonra 1936-1945-ci illərdə “Suraxanıneft” trestində kompressor stansiyasında mexanik, neft mədənində usta, “Bibi-heybət”, “Buzovnaneft” trestlərində müdir vəzifələrində işləmişdir. 1940-cı ildə 28 yaşlı S.Orucov “Qırmızı Əmək Bayrağı” ordeni ilə təltif olunmuşdur. Müharibə illərində neft hasilatının artırılması, müdafiə üçün neft məhsulları və hərbi sursatların istehsalı üzrə dövlət tapşırıqlarını nümunəvi yerinə yetirdiyinə görə 30 yaşlı S.Orucov ölkənin ali mükafatı- Lenin ordeninə layiq görülmüşdür. O dövrdə SSRİ Neft naziri vəzifəsində işləyən görkəmli dövlət xadimi Nikolay Konstantinoviç Baybakov S. Orucovu “Neft Bakısının ən görkəmli şəxsiyyətlərindən biri” adlandırmışdır.
1957-1959-cu illərdə S.Orucov Azərbaycan SSR Xalq Təsərrufatı Şurasının sədri və Azərbaycan SSR Nazirlər Soveti sədrinin müavini, 1959-1962-ci illərdə SSRİ Nazirlər Soveti nəzdində Azərbaycan SSR Nazirlər Sovetinin daimi nümayəndəsi vəzifəsində çalışmışdır.
Ötən əsrin 60-cı illərində S.Orucov Tatarıstanda, Volqa-Ural hövzəsində, Qərbi Sibirdə neft və qaz laylarının təkmilləşdirilməsində yaxından iştirak etmişdir. 1972-ci ildə S.Orucov SSRİ Qaz Sənayesi naziri təyin edilmiş və ömrünün sonuna kimi bu vəzifədə işləmişdir.
S. Orucov işlədiyi bütün dövrlərdə elmlə ciddi məşğul olmuş, 200-dən artıq elmi məqalə, 10 kitab yazmış, bir sıra səmərələşdirici təkliflərlə çıxış etmişdir. Onun təklifləri bu gün də Rusiya və Azərbaycanın qaz sənayesində tətbiq edilir.
1981-ci ildə dünyasını dəyişən görkəmli həmyerlimiz Moskvanın Novodeviçye qəbiristanlığında dəfn edilmişdir. Moskva şəhərində S. Orucovun yaşadığı evin fasadına memorial lövhə vurulmuşdur.
Təhsil nazirinin müavini Qulu Novruzov, AMEA Geologiya İnstitutunun direktoru Adil Əliyev, Neft Akademiyasının prorektoru Sakit Rəsulov çıxış edərək S.Orucovun əmək və elmi fəaliyyətindən danışmışlar.
Tədbirdə iştirak edən S. Orucovun qardaşı oğlu Faiq Orucov əmisinə göstərilən diqqətə görə Azərbaycan Prezidentinə, tədbirin təşkilatçılarına və iştirakçılarIna minnətdarlığını bildirmişdir.
Sonda tədbir iştirakçıları S.Orucova həsr olunmuş sənədli filmə baxmışlar.