Bakı, 22 fevral, AZƏRTAC

AMEA-nın Milli Azərbaycan Tarixi Muzeyi və Azərbaycan Dövlət Pedaqoji Universitetinin (ADPU) birgə təşkilatçılığı ilə “Xocalı faciəsi - milli varlığımıza vurulan zərbə” adlı elmi-praktik seminar keçirilib.

Əvvəlcə şəhidlərin əziz xatirəsi anılıb.

AZƏRTAC xəbər verir ki, tədbirdə muzeyin icraçı direktoru dosent Fərhad Cabbarov bədnam ermənilərin 1992-ci il fevralın 25-dən 26-na keçən gecə Xocalıda törətdikləri soyqırımından danışıb.

F.Cabbarov Xocalı faciəsinin yalnız Azərbaycan xalqına deyil, həmçinin bəşəriyyətə, insanlığa, humanizmə qarşı törədilən ən ağır cinayət olduğunu söyləyib. O, Heydər Əliyev Fondunun vitse-prezidenti Leyla Əliyevanın təşəbbüsü ilə həyata keçirilən “Xocalıya ədalət!” beynəlxalq məlumatlandırma kampaniyasının əhəmiyyətindən bəhs edib.

Xocalı hadisələrinin şahidi, Əməkdar müəllim Murad Şükürov acı xatirələrini bölüşüb, qanlı qırğının heç zaman qan yaddaşımızdan silinməyəcəyini deyib.

Muzeyin Arxeologiya elmi fond şöbəsinin böyük elmi işçisi Laçın Mustafayevin “Xocalı abidələri bəşəriyyətin maddi-mədəni irsidir”, Azərbaycan tarixinin elmi tədqiqi və təqdimi şöbəsinin elmi işçisi Ləman Musayevanın “Xocalı dəhşətləri - bəşəriyyətin mental sağlığına vurulan növbəti zərbə”, Azərbaycan Dövlət Pedaqoji Universitetinin Tarix fakültəsinin magistrantı Aytac Rəhimovanın “Xocalı - gənclərin gözü ilə” mövzularında məruzələri dinlənilib. Qeyd olunub ki, Xocalı soyqırımı zamanı 613 nəfər, o cümlədən 106 qadın, 63 uşaq amansızcasına qətlə yetirilib.

Sonra “Xocalını unutmayaq!” adlı videoçarx, Xocalı haqqında “Müharibə uşaqları” filmi nümayiş olunub.

Azərbaycanın Milli Qəhrəmanı Tofiq Hüseynovun oğlu, Xocalı İcra Hakimiyyətinin Hüquq şöbəsinin müdiri Murad Hüseynov, “Müharibə uşaqları” filminin operatoru Nizami Abbas və digər çıxış edənlər də tariximizə qanla yazılan Xocalı qırğınından bəhs ediblər.