DÜNYA
Tarixi mövzuda çəkilmiş “12 il köləlikdə” filmi “Qızıl qlobus” mükafatına layiq görülmüşdür
Bakı, 13 yanvar (AZƏRTAC). Hollivudda Xarici Mətbuat Assosiasiyasının rəyinə əsasən rejissor Stiv Makkuinin “12 il köləlikdə” filmi 2013-cü ilin ən yaxşı filmi hesab edilmişdir.
“Qravitasiya” filminin rejissoru meksikalı Alfonso Kuaron ən yaxşı rejissor işinə görə mükafat almışdır.
“Ən yaxşı dramatik aktrisa” nominasiyasında Keyt Blanşett Vudi Allenin “Jasmin” filmində ifa etdiyi rola görə qalib gəlmişdir.
Ən yaxşı aktyor adına Ron Vudrufun “Dallas alıcılar klubu” filmində QİÇS xəstəliyinə tutulmuş kişi rolunun ifaçısı Mətyu Makkonaxi layiq görülmüşdür.
“İkinci dərəcəli ən yaxşı aktrisa” nominasiyasında ilin ən yaxşı komediya filmi hesab edilmiş “Amerikansayağı fırıldaq” kriminal tragikomediyasında baş qəhrəmanın arvadı rolunu ifa etmiş 23 yaşlı Cenifer Lourens qalib gəlmişdir.
Cared Leto “Dallas alıcılar klubu” filmində QİÇS xəstəliyinə tutulmuş transseksualın roluna görə “İkinci dərəcəli ən yaxşı kişi rolu” nominasiyasında mükafata layiq görülmüşdür.
Hollivud jurnalistləri İtaliya kinematoqraflarının “Böyük gözəllik” lentini ən yaxşı xarici film hesab etmişlər.
“Qızıl qlobus” Amerika kino mükafatı 1944-cü ildən bəri hər il ən yaxşı kinofilmlərə və televiziya filmlərinə verilir.
Assosiasiyanın 90-a yaxın üzvü 250 milyonluq oxucu auditoriyasına malik olan 55 ölkəni təmsil edir.
Onların Amerika kinosu haqqında materialları Avropa, Asiya, Avstraliya və Latın Amerikasının “Daily Telegraph” (İngiltərə), “Le Figaro” (Fransa), “L'Espresso” (İtaliya), “Vogue” (Almaniya), “China Times” (Çin) və başqa aparıcı qəzet və jurnallarında dərc edilir.