Tarixi Qələbə
Bakı, 10 noyabr, AZƏRTAC
Bu gün - 10 noyabr 2020-ci il Vətənimiz, xalqımız üçün tarixi bir gündür. Bu tarixdə 30 ilə yaxın davam edən Ermənistan-Azərbaycan Dağlıq Qarabağ münaqişəsinə Azərbaycan dövlətinin şanlı qələbəsi ilə son qoyuldu. Bu, tarixi Qələbədir! Azərbaycanın son 200 illik tarixində ilk dəfə müstəqil dövlətimiz mənfur, işğalçı Ermənistan və onun ordusu üzərində şanlı qələbə qazandı. Bu qələbəni təsdiq edən sənədə Azərbaycan Respublikasının Prezidenti İlham Əliyev imza atdı. Bu, Prezidentimizin uğurlu diplomatiyasının, müasir standartlara cavab verən ordu quruculuğu siyasətinin nəticəsi idi. Qələbəni Azərbaycan xalqına Prezident, Müzəffər Ali Baş Komandan İlham Əliyev bəxş etdi. Dövlətimizin başçısı Azərbaycan tarixinə qızıl hərflərlə şanlı səhifələr yazdı. Bu tarix Azərbaycan xalqının kimliyini, onun dövlətinin gücünü, nüfuzunu dünyaya bəyan etdi. Bu Qələbə xalqımızın gələcəyinə elə bir təməl yaratdı ki, onun üzərində Azərbaycan dövləti daim inkişaf edəcək, zənginləşəcək, dünya dövlətləri sırasında ən öndə gedəcək. Qələbə 30 il başı əyilmiş halda gəzən xalqımızın qürurunu, mənliyini özünə qaytardı.
Bu fikirləri AZƏRTAC-a açıqlamasında Bakı Dövlət Universitetinin professoru, tarixçi alim İbrahim Zeynalov söyləyib. O bildirib ki, bu Qələbə son 17 ildə Müzəffər Ali Baş Komandan, Prezident İlham Əliyevin düşünülmüş, uzaqgörən, məqsədli iqtisadi, siyasi və diplomatiya sahəsində həyata keçirdiyi misilsiz tədbirlərin, islahatların, quruculuq və idarəetmə işlərinin nəticəsidir. Həmçinin iqtidar-xalq birliyinin, bütünlükdə ölkədə siyasi birliyin nəticəsidir. Bu Qələbə Azərbaycan dövlətini, xalqını, onun vətənpərvərliyini, Vətənə, torpağa, soy-kökə sadiqliyini dünyaya bəyan etdi. Prezidentimizin uğurlu diplomatiyası nəticəsində bütün sülhsevər bəşəriyyət Azərbaycanın apardığı Vətən müharibəsinin ədalətliliyinə inandı və onu dəstəklədi. Azərbaycan xalqı, qardaş Türkiyə sevinc içərisindədir. Bu sevinci heç nə ilə müqayisə etmək mümkün deyil.
“İmzalanmış bəyanatı və ora daxil edilən bəndləri, xüsusilə mərhələ-mərhələ Ağdam, Kəlbəcər və Laçının qaytarılmasını, Dağlıq Qarabağa heç bir statusun nəzərdə tutulmamasını əks etdirən bəndləri ürəkdən bəyənirik. Bütün bunlar Prezidentimizin müdrik və uzaqgörən dövlətçilik siyasətinin, polad iradəsinin, cəsarətinin, çox yüksək intellektinin nəticəsidir. Eşq olsun Müzəffər Ali Baş Komandana və Azərbaycan Silahlı Qüvvələrinə! Biz sizə inanırıq, sizinlə birlikdəyik! Allah Sizi qorusun!”, - deyə tarixçi alim bildirib.
Bölmənin digər xəbərləri
