Bütün dünyanı heyrətə gətirmiş 44 günlük Vətən müharibəsindəki şanlı Qələbədən üç il ötür

Bakı, 7 noyabr, AZƏRTAC

Ehtiyatda olan polkovnik, Milli Müdafiə Universitetinin Hərbi Elmi-Tədqiqat İnstitutunun professoru, tarix elmləri doktoru Mehman Süleymanov “Tarixi Zəfərin memarı” adlı araşdırma məqaləsi yazıb.

AZƏRTAC üçün məxsusi yazılan məqaləni təqdim edirik:

Bütün dünyanın heyrət və heyranlığına çevrilmiş 44 günlük Vətən müharibəsindəki şanlı Qələbənin əldə olunmasından üç il ötür. Üç il əvvəl Azərbaycan xalqı, onun Ordusu respublika Prezidentinin əmri və çağırışı ilə ayağa qalxıb öz gücünü və iradəsini, nəyə qadir olduğunu 30 il ərzində Azərbaycan torpaqlarını işğal altında saxlayan və bu işğalın əbədiliyinə şübhə etməyən erməni faşizminə nümayiş etdirdi, haqq mübarizəsinə səfərbər olaraq öz qətiyyətini ortaya qoydu. İşğalın əbədiləşdirilməsinə hesablanmış növbəti erməni təxribatı dünya erməniliyinin, erməni faşizminin və belə düşüncəyə havadarlıq edən qüvvələrin belinin qırılmasına yol açan mübarizəyə çevrildi.

2020-ci il sentyabrın 27-də Ermənistan silahlı qüvvələri müxtəlif növ silahlardan, o cümlədən ağır artilleriyadan istifadə etməklə Azərbaycanın bir sıra yaşayış məntəqələrini, habelə müdafiə mövqelərini atəşə tutdular. Atəşkəsin genişmiqyaslı pozulması və yeni erməni silahlı təxribatının baş verməsi haqqında məlumat alan kimi, Azərbaycan Prezidenti, Ali Baş Komandan İlham Əliyev dərhal müdafiə nazirinə, digər səlahiyyətli şəxslərə bu hərbi təxribatın qarşısının alınması üçün müvafiq göstəriş verdi. Nəticədə, Azərbaycanın müdafiə qüvvələrinin Ermənistan silahlı qüvvələrinin təxribatlarının qarşısının alınması üçün əks-hücum əməliyyatları başladı.

Əks-hücum əməliyyatları Vətən müharibəsinə çevrildi

Elə həmin gün də Prezident, Ali Baş Komandan İlham Əliyev baş vermiş hadisə ilə bağlı radio və televiziya ilə Azərbaycan xalqına müraciət etdi. Dövlətimizin başçısı İlham Əliyev bəyan etdi ki, qarşıda dayanan vəzifə yalnız erməni hərbi qüvvələrinin təxribatlarının qarşısının alınması deyil, bütün cəbhə boyu əks-hücuma keçməklə işğal altında qalan Azərbaycan ərazilərinin azad olunmasıdır. Silahlı Qüvvələrin Ali Baş Komandanı qətiyyətlə bildirirdi ki, Azərbaycan münaqişənin yarımçıq həlli ilə barışmayacaq, ərazilərin kimsəyə verilməsi və ərazimizdə ikinci erməni dövlətinin yaradılması ilə heç vaxt barışmayacaq. Belə vəzifənin yerinə yetirilməsi üçün Prezident İlham Əliyev Azərbaycan xalqına və Ordusuna güvəndiyini də vurğuladı. O qeyd etdi ki, başlanan mübarizə haqq mübarizəsidir, bu məsələdə Azərbaycan vətəndaşları dövlətimizin və Silahlı Qüvvələrimizin yanındadır.

Düşmən ordusunun hərbi təxribatlarına qarşı başlanan döyüşlər ilk vaxtlar əks-hücum əməliyyatları adlandırılırdı. Lakin qarşıya qoyulan vəzifələrin miqyasına, hərbi-strateji dəyərinə, həmin vəzifələrin yerinə yetirilməsi üçün cəlb edilən hərbi qüvvələrin sayına, bu istiqamətdə görülən işlərin ümummilli əhəmiyyətinə görə aparılan hərbi əməliyyatlara yeni mövqedən yanaşıldı. 2020-ci il sentyabrın 30-da Mərkəzi Hərbi Klinik Hospitalda müalicə olunun yaralı hərbi qulluqçularla görüşdə Ali Baş Komandan İlham Əliyev həmin döyüşləri “Vətən uğrunda gedən döyüşlər” kimi xarakterizə etdi. 2020-ci il oktyabrın 26-da isə xalqa müraciətində dövlətimizin başçısı İlham Əliyev Ermənistanın işğalçılığına qarşı aparılan savaşı “Vətən müharibəsi” adlandırdı.

Prezident İlham Əliyevin “Qarabağ Azərbaycandır” ifadəsi Azərbaycanın milli mübarizəsinin şüarı oldu

Strateji hədəflərin aydınlığı, həmin hədəflər çərçivəsində bölmə və qüvvələrin konkret vəzifələrinin müəyyənləşdirilməsi, qarşılıqlı əlaqələrin səmərəli nizamlanması, döyüşçülərimizin sonsuz şücaəti, Ali Baş Komandanımızın isə qətiyyəti ona gətirib çıxardı ki, Azərbaycan Ordusu hər gün irəli getdi və yeni ərazilər işğaldan azad edildi. İlham Əliyevin Ali Baş Komandanlığı ilə cəmi ay yarım davam edən Vətən müharibəsində Ermənistana, faşist xislətli erməni-millətçi qüvvələrinə ağır zərbə vuruldu. Düşmən ordusu məhv edildi, Ermənistan dövlətçiliyi isə çox dərin böhranla qarşılaşdı. Bu məsələyə toxunan dövlət başçısı demişdi: “Biz dedik yetər artıq, bu işğala son qoyulmalıdır və son qoyulacaq. Mən Ali Baş Komandan kimi əmr verdim ki, Azərbaycan əsgəri irəli, torpağımızı azad etməliyik, işğala son qoymalıyıq, işğalçını cəzalandırmalıyıq və belə də oldu. Azərbaycan 44 gün ərzində istədiyinə nail oldu, ədaləti bərpa etdi” .

2020-ci il oktyabrın 4-də Cəbrayıl şəhəri, oktyabrın 9-da Hadrut qəsəbəsi, oktyabrın 17-də Füzuli şəhəri, oktyabrın 18-də Araz çayı üzərindəki tarixi Xudafərin körpüsü, oktyabrın 21-də Zəngilan şəhəri, oktyabrın 22-də Zəngilan rayonunun Ağbənd qəsəbəsi erməni işğalından azad edildi. Bundan dörd gün sonra Qubadlı şəhəri və nəhayət, noyabrın 8-də Şuşa şəhəri düşmən tapdağından təmizləndi. Bu zəfərlərin hər biri böyük sevinclə qələbə xəbərlərini gözləyən Azərbaycan xalqına şəxsən Ali Baş Komandan İlham Əliyev tərəfindən çatdırıldı.

Prezident İlham Əliyevin səsləndirdiyi “Qarabağ Azərbaycandır” ifadəsi Azərbaycanın milli mübarizəsinin şüarına çevrildi. Bütün xalqı öz ətrafında birləşdirdi və sonda bu diyarın azad olunmasını təmin etdi. Bununla bağlı dövlət başçısı deyib: “Qarabağ Azərbaycandır və nida” ifadəsi artıq bizim qələbəmizin rəmzi idi, rəmzinə çevrildi. Bir il bundan əvvəl mən bunu demişəm. Mən fəxr edirəm ki, mənim dediyim ifadə artıq bir milli şüara çevrildi. Bu gün böyük qürur hissi ilə deyə bilərik ki, Füzuli bizimdir, Cəbrayıl bizimdir, Zəngilan bizimdir, Qubadlı bizimdir, Ağdam bizimdir, Laçın bizimdir, Kəlbəcər bizimdir, Şuşa bizimdir, Qarabağ bizimdir, Qarabağ Azərbaycandır”.

Ali Baş Komandanımız Vətən müharibəsində qazanılan böyük Qələbənin memarıdır

2020-ci il dekabrın 1-də Ağdam rayonunun erməni işğalından azad olması ilə bağlı xalqa etdiyi müraciətində Ali Baş Komandan İlham Əliyev bu fikirləri səsləndirdi: “Özümü çox xoşbəxt adam hesab edirəm. Çünki bu Qələbə bizim ruhumuzu, əyilməz ruhumuzu göstərdi. Biz bundan sonra böyük və qürurlu xalq kimi yaşayacağıq”. Heç şübhəsiz ki, əldə edilən bu böyük Zəfər həm də hər bir azərbaycanlının xoşbəxt anlarının və qürurunun təcəssümüdür. Həmin anların və qürurun memarı isə müstəqilliyi daimi, əbədi və dönməz olacaq Azərbaycanın tarixində özünə əbədiyyət qazanmış Müzəffər Ali Baş Komandan İlham Əliyevdir.

Dövlətimizin başçısı İlham Əliyev İkinci Qarabağ savaşı dövründə yalnız Ordunun deyil, həm də informasiya və diplomatiya sahəsində aparılan müharibənin baş komandanı idi. Bu müharibənin gizli qalan məqamları olsa da, bütün xalqın gözü qarşısında cərəyan edən səhnələri də mövcuddur. Haqqı ayaq altına alıb haqsızlığın müdafiəsinə qalxmış beynəlxalq media nəhənglərinə qarşı İlham Əliyevin təmkinli, tutarlı, əsaslandırılmış cavabları Azərbaycan Ordusunun cəbhədə əldə etdiyi uğurları tamamladı, xalqımıza tarixi və şanlı Zəfəri qazandırdı. Nəticədə Ulu Öndər Heydər Əliyevin vəsiyyətlərinin həyata keçməsinin sevincini bütün xalqla bölüşən Ali Baş Komandan İlham Əliyev Vətən müharibəsində əldə edilən böyük Qələbənin memarına çevrildi.

İşğal altında qalmış və erməni vəhşiliklərinin şahidi olmuş bütün ərazilərdə hazırda sürətlə davam edən qurub-yaratmaq işləri bütün dünyanın gözü qarşısında yeni Azərbaycan möcüzəsinə çevrilməkdədir. Bu möcüzə 2023-cü il sentyabrın 19-20-də böyük uğurla həyata keçirilmiş lokal antiterror tədbirləri ilə daha da tamamlandı, Azərbaycanın suverenliyi tam bərpa edildi və bununla ölkəmiz tarixinin yeni dövrünə daxil oldu.