TBİLİSİDƏ YENİ YERALTI TƏKANLAR
27 -də səhər saat 09.17-də Tbilisidə yenidən zəlzələ baş vermişdir. İlkin məlumata görə, yeraltı təkanların gücü 3,5 bala çatmışdır. Zəlzələnin episentri, tələfat və dağıntılar barədə məlumat verilməmişdir.
Tbilisidə yeraltı təkanlar aprelin 26-da da hiss olunmuşdu. Lakin Gürcüstan paytaxtında ən güclü zəlzələ aprelin 25-də axşam baş vermişdi. Onda təkanların gücü Rixter cədvəli ilə 6 bala çatmışdı. Zəlzələnin mərkəzi Tbilisinin təxminən 12 kilometrliyində olmuşdur.
Təbii fəlakət nəticəsində 6 nəfər həlak olmuş,15 nəfər xəsarət almışdır. Xəstəxanalara cəmi 42 nəfər müraciət etmişdir. XIX əsrdə - XX əsrin birinci yarısında tikilmiş 450 ev dağılmışdır və sökülməlidir. 2 minədək evin əsaslı təmirə ehtiyacı var.
Qazpaylayıcı şəbəkə də ciddi zədələnmişdir. Şəhərdə 30-dan çox qəza qeydə alınmışdır. Lakin təmir işlərinə başlamazdan əvvəl şəhərin bütün qaz kəməri şəbəkəsinin texniki vəziyyətini yoxlamaq lazımdır.
İTAR-TASS xəbər verir ki, Tbilisi ətrafındakı bir sıra rayon və şəhərlərdə, o cümlədən Qori, Qardabani və Rustavidə də dağıntılar var. İlkin məlumata görə, zəlzələ 40 milyon dollar məbləğində zərər vurmuşdur.
Bölmənin digər xəbərləri
