TƏBABƏT XƏBƏRLƏRİ
OTTAVA. Kanada alimləri güman edirlər ki, indiyədək kimyəvi terapiyanın köməyi ilə müalicə etmək mümkün olmayan süd vəzi xərçənginin hüceyrələri ilə mübarizə üsulunu tapmışlar.
Kinqstondakı Kraliça Universitetində aparılmış tədqiqat göstərmişdir ki, hüceyrələr əvvəlcədən zəif konsentrasiyalı nitroqliserinin təsirinə məruz qaldıqda kimyəvi terapiya səmərəli nəticə verir. Bu halda onlar azot turşusu hasil etməyə başlayır və bu turşu bədxassəli hüceyrələri dərman preparatlarının təsirinə “reaksiya verməyə” vadar edir.
Alim Maykl Adams deyir ki, tədqiqatçılar süd vəzi xərçəngi hüceyrələrinin kimyəvi terapiyaya müqavimət qabiliyyəti mexanizmini dəqiq müəyyənləşdirməmişlər. Lakin onlar bunu hüceyrələrdə oksigen çatışmazlığı ilə bağlayırlar ki, bu da azot turşusu hasil etməyə mane olur.
İTAR-TASS-ın verdiyi xəbərə görə, universitet alimlərinin apardıqları eksperiment zamanı hüceyrələrdə azot turşusu hasilatını stimullaşdırmaq üçün digər xəstəliklərin müalicəsində geniş tətbiq olunan nitroqliserindən istifadə edilmişdir. Ehtimal özünü doğrultmuşdur. Adams deyir: “Bu, həqiqətən, kəşfdir”. İndi alimlər klinik tədqiqatlar aparmağa hazırlaşırlar. Eksperiment haqqında elmi məruzə Amerikanın “Milli Onkologiya İnstitutunun jurnalı”nda dərc edilmişdir.
X X X
MEXİKO. “Əgər siz İnternetdə hər hansı tibb səhifəsini təsadüfən oxuyaraq, özünüzdə hansısa qəribə və indiyədək məlum olmayan xəstəliyin əlamətlərini hiss etsəniz, o dəqiqə vahiməyə düşməyin, əks halda, “kiberxondriya” xəstəliyinə tutula bilərsiniz”.
Müxtəlif mütəxəssislərin fikrincə, “kiberxondriklər” İnternetdən özünə müstəqil diaqnoz qoymaq üçün istifadə edən adamlardır. Meksikalı psixoloq Serxio Oliverin dediyi kimi, onlar hesab edirlər ki, ölümcül xəstədirlər və artıq can üstündədirlər.
Təəssüf ki, Meksikadakı “kiberxondriklər”in dəqiq sayı məlum deyil, amma yardım üçün psixoloqlara müraciət edən adamların 10 faizinə elə gəlir ki, onlarda İnternetdə oxuduqları naməlum xəstəliklərin fantastik əlamətləri var. Məhz belələri “kiberxondrik”lərdir.
İnternetdə hansısa xəstəlik barədə məlumatla rastlaşan kimi, özündə bunun bütün əlamətlərini tapan “kiberxondrik”in canına vələvələ düşür və bu dəhşətli azar barəsində daha çox məlumat almağa çalışr.
Ən qorxulusu budur ki, belə adamlar öz həkimlərinə inanmır və əlacı İnternetdə tapmağa çalışırlar.
Statistikanın göstərdiyi kimi, meksikalılar İnternetə ən çox ruh düşkünlüyü, allergiya, xərçəng, revmatizm, hipertoniya, miqren, qocalma, yuxusuzluq və seksual passivlik kimi xəstəliklər barəsində məsləhət almaq üçün müraciət edirlər.
X X X
BERLİN. Alman epidemioloqları hazırda ölkədə aşkara çıxarılmış salmonellezin - kəskin bağırsaq infeksiyasının geniş yayılmasından narahatdırlar. Robert Kox İnstitutu ekspertinin bildirdiyinə görə, bugünədək 270-dən çox adam xəstəxanaya düşmüşdür ki, onların da yarısı uşaqlardır.
Əslində, bu xəstəliılə yoluxma halları bütün federal ərazilərdə, ən çox isə Şimali Reyn-Vestfaliya və Aşağı Saksoniyada qeydə alinmışdır.
Almaniyanın tanınmış epidemioloqlarının fikrincə, kütləvi surətdə yoluxmaya səbəb “Aldi” ərzaq mağazalarında satılan xarab olmuş şokoladdır. İlkin məlumata görə, Halle şəhərindəki VİXA firmasının “Şato Alpenzane”, “Şato Ram-Mandel” və “Şoke Ram-Mandel” şokoladları xüsusilə təhlükəlidir.
Laboratoriya araşdırmaları zamanı şokoladda dərman preparatlarına qarşı son dərəcə davamlılığı ilə fərqlənən bakteriyalar aşkara çıxarılmışdır.
Bölmənin digər xəbərləri
