ABŞ Prezidenti yanında Milli Kəşfiyyat Şurası belə bir dəhşətli proqnoz verir: 2010-cu ilədək Rusiya əhalisinin 8 faizindən 10 faizinə qədəri immunitet çatışmazlığı virusunun (İÇV) daşıyıcısı olacaqdır. 

Şuranın məlumatına görə, ötən ilin sonlarında Rusiyda 700 minədək adamın bu virusa yoluxduğu qeydə alınmışdır. Onlar əsas etibarilə narkomanlardır. Alimlərin proqnozlarına görə, səkkiz ildən sonra bu rəqəm on dəfədən də çox arta bilər. Məruzənin müəllifləri bildirirlər: “Rusiya o qədər çox problemlərlə qarşılaşır ki, İÇV-nin və QİÇS-in yayılması məsələsi hələ uzun müddət çətin ki xüsusi diqqət cəlb etsin”.

Ameirika alimlərinin fikrincə, Rusiya ilə yanaşı, Çin, Hindistan, Efiopiya və Nigeriya da QİÇS-in yayılması ilə bağlı ciddi problemlərlə üzləşəcəklər. Ekspertlər bildirirlər ki, bu beş ölkənin əhalisi Yer kürəsi əhalisinin 40 faizini təşkil edir. 2010-cu ilədək İÇV-yə yoluxanların 50-75 milyona qədəri onların payına düşəcəkdir.

Bir çox epidemioloqların qənaətinə görə, məruzədəki rəqəmlər çox şişirdilib və vəziyyət, əslində, heç də belə qorxulu deyildir. Bununla belə, QİÇS, vərəm və malyariya əleyhinə beynəlxalq mübarizə fondunun direktoru Riçard Fiçem hesab edir ki, tədqiqatın müəllifləri, necə deyərlər, məsələnin mahiyyətinə varırlar. R.Fiçem deyir: “Həmin problemə xüsusi diqqət yetirmək son dərəcə vacibdir, bu halda onun müzakirəsi beynəlxalq səviyyədə aparılar”.

İTAR-TASS-ın verdiyi xəbərə görə, hazırda dünyada 42 milyon İÇV daşıyıcısı yaşayır, BMT ekspertlərinin gümanına görə isə səkkiz ildən sonra onların sayı 60 milyon nəfərə çatacaqdır. Milli Kəşfiyyat Şurasının nümayəndələri isə daha dəhşətli rəqəmlər göstərirlər - 80 milyondan 110 milyon nəfərədək.

ABŞ Prezidenti yanında Milli Kəşfiyyat Şurası mühüm strateji məsələlərə dair öz tövsiyələrini təkcə dövlət başçısı üçün deyil, həm də Mərkəzi Kəşfiyyat İdarəsi, Pentaqon, Dövlət Departamenti, Milli Təhlükəsizlik Şurası və digər hökumət idarələri üçün də hazırlayır.

X x x

Harada oturmaq daha məqsədəuyğundur - siqaretdən tüstü-dumana bürünmüş barda, yoxsa, avtobusun tüstü borusunun yanında? Söhbət belə ağlagəlməz seçimdən gedərsə, Nyu-Yorkun hakimiyyət orqanları avtobusu seçməyi tövsiyə edirlər. Onlar iddia edirlər ki, barların havası avtomobil tıxacları olan küçələrdəkindən qat-qat zəhərlidir.

Şəhərin səhiyyə departamenti ən dəqiq cihazların köməyi ilə keçirdiyi araşdırmalar əsasında bu nəticəyə gəlmişdir ki, siqaret çəkməyə icazə verilən adi barın havasındakı zərərli maddələr Qudzon çayı altından keçən, avtomobil axınının ucu-bucağı görünməyən Holland tunelinin girəcəyindəkindən 50 dəfə çoxdur.

Əgər siqaret çəkilən bardakı havanın vəziyyəti ilə Nyu-Yorkun Mərkəzi parkındakı havanın vəziyyəti müqayisə edilsə, barın havası yüz dəfədən də artıq çirkli olacaqdır.

Beləliklə, Nyu-York şəhərinin meri Maykl Blumberq son elmi məlumatları əsas tutaraq, “onun sərəncamında olan ərazinin” hər yerində, o cümlədən barlarda və restoranlarda siqaret çəkilməsi ilə qətiyyətli mübarizə aparmaq əzmində olduğunu bildirmişdir. ABŞ-da digər ştatlar, məsələn, Kaliforniya və Delaver ştatları da bu niyyətdə olduqlarını elan etmişlər.

X x x

Çin həkimləri iddia edirlər ki, rahat və dərin yuxu sağlamlığın, uzunömürlülüyün və yaxşı əhval-ruhiyyənin rəhnidir. Onların fikrincə, yuxu həyatımızda olduqca mühüm yer tutur və ondan çox şey asılıdır.

Beləliklə, ilk növbədə, çalışmaq lazımdır ki, yuxu dərin və sağlam olsun. Lakin bunu necə etməli?

Əvvəla, yuxu rejiminə riayət etmək - eyni vaxtda yatmaq və eyni vaxtda yuxudan durmaq lazımdır. İnsanın orqanizmi və beyni dəqiq cədvəl üzrə istirahət etməlidir. Bu, beyin hüceyrələrinin həddindən artıq yorulmasının qarşısını almağa kömək edir. Hər bir insanın öz gecə-gündüz ritmi ilə yaşadığı nəzərə alınarsa, hər kəsin rejimi də fərdi olmalıdır.

Bununla belə, həkimlərin dəyərli məsləhətlərinə də qulaq asmaq lazımdır. Məsələn, yatmazdan əvvəl fiziki işdən, gərgin zehni əməkdən, emosional söhbətlərdən uzaq olmaq tövsiyə edilir. Yatmazdan əvvəl mədəni yağlı qeməklə doldurmaq məsləhət görülmür. Tərəvəzdən və yarmadan ibarət yüngül şam yeməyi ilə kifayətlənmək lazımdır.

Yatmazdan əvvəl təmiz havada gəzmək və ilıq vanna qəbul etmək çox faydalıdır - onlar əzələlərin boşalmasına və gün ərzində toplanmış gərginlikdən yaxa qurtarmağa kömək edirlər.

Həkimlər yorğan-döşəyə girməzdən əvvəl yataq otağının pəncərələrini açmağı və otağın havasını dəyişməyi məsləhət görürlər. Təmiz və azacıq rütubətli hava yatan adamın ağ ciyərlərinə yaxşı təsir göstərir.

Bundan əlavə, həkimlərin fikrincə, yuxunun, necə deyərlər, “keyfiyyətini” yaxşılaşdırmaq üçün yataq otağında əlverişli şərait yaratmaq lazımdır. Bu, ilk növbədə divarların rənginə aiddir. Qırmızı, narıncı və sarı rənglər göz sinirlərini yoraraq, insanların yuxuya getməsinə mane olur, mavi, ağ rənglər isə yuxu üçün daha münasibdir.

İnsan öz ömrünün üçdə birini yuxuda keçirir. Buna görə də, Çin təbiblərinin dediyi kimi, sağlam və dərin yuxu gün ərzində ruhi tarazlığı və həyat qabiliyyətini qoruyub saxlamağa kömək edir. Yuxunuz şirin olsun və gözəl yuxular görəsiniz!

X x x

Çinlilər nəinki ən çoxsaylı, bəlkə də idmanla daha çox məşğul olan millətdir.

Səhər tezdən Pekinin istənilən parkında və bağçasında müxtəlif idman və bədən tərbiyəsi hərəkətlərini yerinə yetirən adamlar görmək olar. Onların əksəriyyətinin yaşı 60-ı keçmişdir, aralarında ahıllar da az deyildir. Sosioloqlar hesablamışlar ki, əhalisi bir milyardı ötən ölkədə sakinlərin dörddə bir hissəsindən çoxu idmanla müntəzəm məşğul olur. Bütün tədris ocaqları, müəssisə və idarələr, kəndlər, ordu hissələri, pensiyaçılar və hətta əlillər kütləvi bədən tərbiyəsinə cəlb edilmişdir.

İndi Çin paytaxtı idman şüarlarına bürünmüşdür. Plakatlar, transparantlar və hətta taksilərə yapışdırılmış vərəqələr “Yeni Pekin qurmağa və tarixdə ən yaxşı Olimpiya oyunları keçirməyə” çağırır. 2008-ci ildə Olimpiada ərəfəsində burada yeni-yeni pulsuz idman meydançaları tikilir, baxmayaraq ki, onların sayı indi də həddən çoxdur.

Bütün orta və ali məktəblər idman məşğələləri avadanlığı ilə təmin edilmişdir. Bu da təbiidir, çünki Çin uşaqları üçün, bədən tərbiyəsi də məsələn, riyaziyyat qədər çox vacibdir. Ali məktəblərin qapıları idman normativlərini ödəməyənlərin üzünə bağlıdır.

Hakimiyyət orqanlarının fikrincə, siqaret çəkmək kimi çətin problemə də qalib gəlmək üçün idman ən etibarlı vasitədir, çünki bütün səylərə rəğmən, çinlilər planetdə ən çox siqaret çəkən millət olaraq qalır. Bədən tərbiyəsi gəncləri narkomanlıqdan yayındırmağa da kömək edir.