DÜNYA
TƏBABƏT YENİLİKLƏRİ
Tanınmış Rusiya kardiocərrahı Renat Akçurinin nadir işinin nəticələri onkoloji və eyni zamanda ürək-damar xəstəlikləri olan ağır xəstələri müalicə etməyə itmkan verir.
R.Akçurin İTAR-TASS-ın müxbiri ilə söhbətində demişdir ki, Kardioloji Elmi Mərkəzin cərrahları bu işi Onkoloji Elmi Mərkəzlə birlikdə təxminən 10 il aparmışlar. Həkimlər elə bir müalicə sistemi hazırlamağı qarşılarına vəzifə qoymuşdular ki, ürək-damar xəstəlikləri olan xəstələrdə xərçəng şişləri aşkara çıxarılarsa onlarda cərrahiyyə əməliyyatı aparmaq mümkün olsun. Əvvəllər kardiocərrahlar onkoloji xəstəliyi olan adamlarda belə cərrahiyyə əməliyyatları aparmaqdan adətən imtina edirdilər. Akçurin bildirmişdir ki, bu müddət ərzində 150 xəstədə uğurla cərrahiyyə əməliyyatı aparılmış və nətimcədə onların halı yaxşılaşmışdır. Bu cür əməliyyatlar Qərb ölkələrində də aparılır, lakin, Akçurinin fikrincə, “onların kollektiv təcrübəsi Rusiyadakına nisbətən xeyli azdır”.
Rusiyada nə qədər xəstənin onkoloji və ürək-damar xəstəliklərinin eyni zamanda müalicəsinə ehtiyac duyduğuna dair rəsmi statistika yoxdur. R.Akçurin demişdir: Lakin insanların ürək-damar xəstəliklərinə ahıl yaşda, onkoloji xəstəliklərə isə 50 yaşdan sonra tutulduqları nəzərə alınarsa, belə müalicəyə böyük ehtiyac olduğu güman edilə bilər.
X x x
Avropa Birliyinin statistika orqanının - Avrostatın və Avropa Şurasının rəsmi məlumatına görə, Fransa qadınları uzunömürlülük üzrə qitədə birinci yerə çıxmışlar. Onlar bu baxımdan öncül sayılan İtaliya və İspaniyadan olan “rəqiblər”ini geridə qoymuşlar. Hazırda onların orta ömür səviyyəsi 83 yaşa çatır. Fransalı kişilər 73,5 yaşla kifayətlənirlər.
İndi Avropa Birliyi ölkələrində kişilər və qadınlar üçün bu göstərici müvafiq surətdə 75,3 və 81,4 yaşa bərabərdir. Həmin ölkələrdə 1980-ci illə müqayisədə kişilər 4,8 il, qadınlar 4,2 il çox yaşyırlar. “Kişilər arasında rekord” İsveçə məxsusdur - 75,5 yaş. Ekspertlər Avropada ömrün uzanmasının səbəbini dəqiq müəyyənləşdirməkdə çətinlik çəkirlər. Həqiqi səbəbi, yəni bunun ümumən sağlam vərdişlərin xeyrinə profilaktiki kampaniya aparılması ilə, yoxsa daha yaxşı qidalanma və ya xüsusi milli həyat tərzi ilə bağlı olub-olmadığını heç kim bilmir. Buna baxmayaraq, mütəxəssislər bildirirlər ki, insan ömrünün artması heç də bu və ya digər ölkədə həyatın ümumiyyətlə yaxşılaşmasına dəlalət etmir. Onların fikrincə, burada başlıca amil insanın öz sağlamlığına münasibəti və ilk növbədə siqaret çəkməkdən, alkoqollu içkilərdən və narkotiklərdən imtina etməsidır.
X x x
İTAR-TASS-ın verdiyi xəbərə görə, Amerika, Britaniya və Avstraliya alimləri insan orqanizmində “toxluq hormonu” aşkara çıxarmışlar. Onların rəyincə, bu kəşf piylənmə ilə səmərəli mübarizə üçün preparatlar hazırlamağa imkan yaradacaqdır.
Yeni hormona RUU-3-36 adı verilmişdir. O, beyinə xəbərdarlıq edir ki, orqanizm artıq qədərincə qida almışdır. Normal çəkili könüllülərdə aparılmış təcrübələr zamanı onlara hormon vurulmuş və çox maraqlı nəticələr əldə edilmişdir. Ac qalmış adamlardan ibarət iki qrupa - onlardan birinə hormon inyeksiyası edilmiş, digərinə isə yox - cürbəcür ləziz yeməklər təklif olunmuşdur.
Müəyyən edilmişdir ki, birincilər ikincilərdən təxminən üçdə bir qədər az yemişlər və onların yeməyinin gündəlik kaloriliyi “acgözlər”ə nisbətən 33 faiz az olmuşdur. Tədqiqatçılar “toxluq hormonu” effektini imitasiya edən və insana normadan artıq kökəlməyə imkan verməyən yeni preparatları sintezləşdirmək niyyətindədirlər. Onlar bir daha xatrıladırlar ki, bir çox xəstəliklərin əmələ gəlməsinə səbəb insanın normadan artıq kökəlməsidir.