Bakı, 1 mart (AZƏRTAC). İranın Şərqi Azərbaycan vilayətində - Təbrizdə nəşr olunan nüfuzlu “Şəhriyar” qəzetində Naxçıvan Muxtar Respublikasının yaradılmasının 90 illik yubileyi ilə bağlı məqalə dərc edilmişdir.

AZƏRTAC xəbər verir ki, məqalədə Naxçıvan Muxtar Respublikasının yaradılması prosesinin tarixi, XX əsrin əvvəllərində regiondakı hərbi-siyasi şəraitdən istifadə edən erməni daşnaklarının bu bölgəyə əsassız ərazi iddiaları, erməni millətçilərinin Azərbaycanın bir çox bölgələrində, o cümlədən Naxçıvanda dinc əhaliyə qarşı törətdikləri qırğınlar, muxtar respublikanın İran, o cümlədən bu ölkənin sərhəd vilayətləri ilə əlaqələri, son 10 ildə Naxçıvanın nail olduğu sosial-iqtisadi inkişafdan bəhs edilir.

“Qars” müqaviləsinin tarixi mahiyyətinə toxunularaq bildirilir ki, ermənilər sovet hakimiyyətinin ayrı-seçkilik siyasətindən istifadə edərək Naxçıvanın bir sıra torpaqlarını xaincəsinə ələ keçirmişlər. Beləliklə də Naxçıvan Muxtar Respublikasının təsis edildiyi dövrdəki dövlət sərhədləri pozulmuşdur.

Məqalədə ümummilli lider Heydər Əliyevin xilaskarlıq missiyasından bəhs edilərək yazılır ki, Azərbaycan xalqının böyük oğlu uzaqgörən siyasəti nəticəsində Naxçıvanın İran və Türkiyə ilə əlaqələrinin genişləndirilməsinə nail olmuş və bununla da təcavüzkar Ermənistan tərəfindən blokadaya alınmış muxtar respublikanın sosial - iqtisadi inkişaf istiqamətlərini müəyyən etmişdir. Bu siyasətin nəticəsidir ki, son illər Naxçıvanda iqtisadiyyatın inkişafına yönəldilmiş sərmayənin həcmi sürətlə çoxalmış, sənaye və kənd təsərrüfatında əhəmiyyətli dinamika yaranmış, tikinti sektorunda böyük artım baş vermiş, əhalinin rifahı yüksəlmişdir.

Əldə olunmuş nailiyyətlər barədə müfəssəl məlumatın yer aldığı məqalədə Naxçıvana və onun əhalisinə xoş, firavan həyat arzulanmışdır.

Məqalə muxtar respublikanın tarixi abidələrindən bir neçəsinin fotosu ilə birlikdə qəzetin elektron versiyasında da yerləşdirilmişdir. (http://shahryaronline.ir/images/PDF_Nashriye/263.pdf)