SİYASƏT
Tehranda Azərbaycanın Respublika Gününə və diplomatik xidmət orqanlarının 100 illik yubileyinə həsr olunmuş rəsmi qəbul keçirilib VİDEO
Tehran, 12 iyun, AZƏRTAC
Azərbaycan Respublikasının İran İslam Respublikasındakı səfirliyində Respublika Gününə və diplomatik xidmət orqanlarının 100 illik yubileyinə həsr olunmuş rəsmi qəbul təşkil edilib.
Qəbulda İranın İqtisadiyyat və maliyyə işləri naziri Fərhad Dejpəsənd, İran-Azərbaycan parlamentlərarası işçı qrupunun rəhbəri Salman Xodadadi, deputatlar, ictimaiyyət nümayəndələri iştirak ediblər.
AZƏRTAC xəbər verir ki, hər iki ölkənin dövlət himnləri səsləndirildikdən sonra çıxış edən ölkəmizin İrandakı səfiri Bünyad Hüseynov müsəlman Şərqində ilk demokratik respublikanın 1918-ci il mayın 28-də məhz Azərbaycanda yarandığını diqqətə çatdırıb. Bildirib ki, demokratik hüquq və azadlıqların təmin edilməsi, etnik, dini və siyasi mənsubiyyətdən asılı olmayaraq bütün vətəndaşların bərabər hüquqlara malik olması, Şərqdə ilk dəfə qadınlara seçki hüququnun verilməsi Azərbaycan Xalq Cümhuriyyəti dövründə həyata keçirilib. Azərbaycan 1991-ci ildə dövlət müstəqilliyini bərpa etdikdən sonra ölkəmizdə 28 May - Respublika Günü kimi qeyd edilir.
Xüsusilə vurğulanıb ki, vaxtilə Azərbaycan Xalq Cümhuriyyətinin dövlət rəmzi olmuş üç rəngli, ay-ulduzlu bayraq sonradan ilk dəfə 1990-cı il noyabrın 17-də Naxçıvan Muxtar Respublikası Ali Məclisinin Sədri, ümummilli lider Heydər Əliyevin təşəbbüsü və rəhbərliyi ilə keçirilən sessiyada Naxçıvan Muxtar Respublikasının dövlət bayrağı olaraq təsdiqlənib.
Səfir bildirib ki, Azərbaycan diplomatik xidmət orqanları məhz Xalq Cümhuriyyəti dövründə yaradılıb. Belə ki, 1919-cu ilin 8 iyulunda Azərbaycan Xalq Cümhuriyyəti Xarici İşlər Nazirliyinin müvəqqəti təlimatı qəbul edilib. Azərbaycan Prezidenti İlham Əliyevin Sərəncamı ilə həmin tarix hər il Azərbaycanda diplomatik xidmət əməkdaşlarının peşə bayramı kimi qeyd olunur.
Azərbaycan ərazisinin 20 faizinin Ermənistan tərəfindən işğal edilməsini diqqətə çatdıran səfir deyib: “İşğalçı Ermənistan istisna olmaqla, Azərbaycanın bütün qonşuları ilə dostluq və qarşılıqlı faydalı əməkdaşlıq əlaqələri var. Azərbaycan Respublikası ilə İran İslam Respublikası arasında bütün sahələrdə əlaqələr dinamik inkişaf edir. Ölkələrimizin münasibətləri ortaq tarixə, mədəniyyətə, xalqlarımızın ənənəvi dostluğuna söykənir. İran Azərbaycanın müstəqilliyini ilk tanıyan və dəstəkləyən dövlətlərdən biridir. Bu gün Azərbaycanın xarici siyasətində qonşu dövlətlərlə, xüsusilə İranla əməkdaşlıq əlaqələrini inkişaf etdirmək prioritet xətt təşkil edir.
Qeyd olunub ki, tarixboyu sivilizasiyaların və mədəniyyətlərin qovuşuğunda yerləşən, Asiya və Avropa arasında körpü rolunu oynayan Azərbaycan multikulturalizmin, mədəniyyətlərarası və sivilizasiyalararası dialoqun qurulmasına, İslam dəyərlərinin dünyada təbliğinə böyük töhfələr verir.
Sonra çıxış edən İranın İqtisadiyyat və maliyyə işləri naziri Fərhad Dejpəsənd İran-Azərbaycan müştərək iqtisadi komissiyasının həmsədri kimi ölkələrimizin əlaqələrinin yüksələn xətt üzrə inkişaf etdiyini vurğulayıb. İki dövlət arasındakı əlaqələrin yüksək səviyyəyə qalxmasında Prezident Həsən Ruhani və Prezident İlham Əliyevin siyasi iradəsinin mühüm əhəmiyyətə malik olduğunu bildirən nazir qeyd edib ki, ölkələrimiz arasında xüsusilə siyasi, iqtisadi və humanitar əlaqələr gündən-günə inkişaf edir. Azərbaycan ilə İran, həmçinin Şimal- Cənub beynəlxalq nəqliyyat dəhlizinin təkmilləşdirilməsində iştirak edirlər. Bu dəhliz vasitəsilə Fars körfəzi və Cənub Şərqi Asiya ölkələri İran və Azərbaycandan keçməklə Qara dəniz, Rusiya və Avropa ilə birləşəcəklər.
Dövlət başçılarının qarşılıqlı rəsmi səfərlərinə toxunan nazir, bu səfərlərin ikitərəfli münasibətlərin inkişafına yeni töhfələr verdiyini vurğulayıb, İran-Azərbaycan münasibətlərini qonşu ölkələr arasındakı münasibətlərə nümunə kimi göstərib.
Fərhad Dejpəsənd İran hökuməti və xalqı adından Azərbaycan dövlətini və xalqını Respublika Günü, həmçinin Azərbaycan diplomatik xidmət orqanlarının əməkdaşlarını peşə bayramı münasibətilə təbrik edib.
Tədbir səfirliyin əməkdaşlarının övladlarının iştirakı ilə hazırlanmış bədii proqramla davam edib.
Rabil Kətanov
AZƏRTAC-ın xüsusi müxbiri
Tehran