ELM VƏ TƏHSİL
“Təhsildə müasir texnologiyalar” mövzusunda işgüzar missiya
Bakı, 13 noyabr, AZƏRTAC
Təhsil Nazirliyinin dəstəyi və Rusiya Eksport Mərkəzinin təşkilatçılığı ilə “Təhsildə müasir texnologiyalar” mövzusunda Rusiya şirkətlərinin Azərbaycana işgüzar missiyası təşkil olunub.
Təhsil Nazirliyindən AZƏRTAC-a bildiriblər ki, təhsil işçiləri üçün “Rusiyanın təhsil mühiti üçün yeni texnologiyaları” mövzusunda konfrans keçirilib. Şirkət nümayəndələrinin və təhsil işçilərinin iştirak etdikləri konfransda çıxış edən Rusiyanın Azərbaycandakı səfiri Mixail Boçarnikov bildirib ki, ölkələrimiz arasında bütün sahələrdə əlaqələr uğurla inkişaf edir. O, təhsildə müasir texnologiyalar sahəsində işgüzar missiyanın təşkilini yüksək qiymətləndirib və ölkələr arasında bu sahədə əməkdaşlığa töhfə verəcəyinə əminliyini ifadə edib.
Təhsil Nazirliyinin Təhsil Sisteminin İnformasiyalaşdırılması İdarəsinin rəisi Vüsal Xanlarov ölkəmizdə təhsil sistemində informasiya-kommunikasiya texnologiyalarının tətbiqi üzrə aparılan işlər barədə məlumat verib və bu texnologiyalardan istifadənin dünya standartları səviyyəsinə çatdırılmasının əhəmiyyətindən danışıb.
Sonra Rusiya şirkətlərinin təhsil avadanlığı və tədris vəsaitləri ilə bağlı təqdimatları dinlənilib və iştirakçılar şirkətlərin stendləri ilə tanış olublar.
İşgüzar missiya çərçivəsində Rusiya nümayəndə heyəti ümumi təhsil, peşə təhsili və ali təhsil müəssisələrində olub. Tədbirlərdə Rusiyanın təhsil sahəsində avadanlıq, proqram təminatı, məktəb mebeli, təhsilalanların yaradıcılıq istedadını püxtələşdirmək üçün alətlər təqdim olunub və əməkdaşlıq əlaqələri müzakirə edilib.