Təhsildə rəqəmsal transformasiyalar- III Milli Təhsil Zirvəsi
Bakı, 13 aprel, AZƏRTAC
Azərbaycan Respublikası Təhsil Cəmiyyətinin təşkilatçılığı, Azərbaycan Elm və Təhsil İşçiləri Həmkarlar İttifaqının və Türkiyə Cümhuriyyəti Özyeğin Universitetinin dəstəyi ilə Bakı Slavyan Universitetində “Təhsildə rəqəmsal transformasiyalar” mövzusunda III Milli Təhsil Zirvəsi keçirilib.
Bu barədə AZƏRTAC-a Təhsil Cəmiyyətindən məlumat verilib.
Tədbiri açan Təhsil Cəmiyyətinin İdarə Heyətinin sədri Murad Ağalarov müasir dövrdə təhsilin rəqəmsallaşdırılmasının əhəmiyyətindən danışıb. Qeyd edib ki, qlobal təcrübənin öyrənilməsi, qabaqcıl universitetlərlə əlaqələrin genişləndirilməsi və birgə layihələrin həyata keçirilməsi Azərbaycan təhsilinin dünya təhsil məkanına inteqrasiyanı sürətləndirir. Bildirib ki, Özyeğin Universiteti ilə əməkdaşlıq bu baxımdan xüsusi əhəmiyyət daşıyır və qarşılıqlı təcrübə mübadiləsinə geniş imkanlar yaradır.
Murad Ağalarov belə Zirvə görüşlərinin təhsil ictimaiyyətinin bir araya gəlməsi, aktual problemlərin müzakirəsi və innovativ həll yollarının müəyyənləşdirilməsi baxımından mühüm platforma olduğunu vurğulayıb.
Zirvədə çıxış edən Milli Məclisin deputatı Ceyhun Məmmədov təhsil sahəsində aparılan islahatların və rəqəmsal transformasiyanın cəmiyyətin inkişafındakı rolu barədə fikirlərini bölüşüb. Bildirib ki, Azərbaycanın təhsil sahəsində əldə etdiyi uğurlar dövlətin bu sahəyə göstərdiyi diqqət və qayğının nəticəsidir. O, çıxışında gənclərin rəqəmsal bacarıqlarının inkişaf etdirilməsinin vacibliyini də xüsusi qeyd edib. Deputat gənclərin süni intellekt, proqramlaşdırma, data analitikası və rəqəmsal alətlərlə işləmək bacarıqlarının inkişaf etdirilməsinin onların gələcək karyera imkanlarını genişləndirdiyini və əmək bazarında rəqabət qabiliyyətini artırdığını söyləyib.
Elm və Təhsil İşçiləri Həmkarlar İttifaqı sədrinin müavini Mirzə Cəfərzadə müasir dövrdə təhsil sistemində baş verən yeniliklərin müəllimlərin fəaliyyətinə yeni tələblər irəli sürdüyünü diqqətə çatdırıb. Bildirib ki, rəqəmsal texnologiyaların təhsilə tətbiqi yalnız texniki məsələlərlə məhdudlaşmayıb, eyni zamanda, müəllimlərin bu yeniliklərə uyğun hazırlanması, onların davamlı təlimlərə cəlb olunması və peşəkar bacarıqlarının artırılması ilə müşayiət olunmalıdır.
Azərbaycan Respublikası Təhsil İnstitutunun direktor müavini Fuad Qarayev çıxışında rəqəmsal texnologiyalar və süni intellektin təhsilə inteqrasiyasının gələcək nəsillərin daha çevik, yaradıcı və rəqabətqabiliyyətli formalaşmasına xidmət etdiyini söyləyib, rəqəmsal bacarıqların inkişafının yalnız fərdi uğur üçün deyil, bütövlükdə ölkənin iqtisadi və sosial inkişafı üçün də strateji əhəmiyyət daşıdığı haqqında fikirlərini diqqətə çatdırıb.
Tədbirdə çıxış edən Türkiyə Cümhuriyyəti Özyeğin Universitetinin Təlim və tədris ofisi direktoru professor Cengiz Hakan Aydın bildirib ki, qlobal təhsil mühitində rəqəmsal platformalar, hibrid təhsil modelləri və süni intellektəsaslı alətlər getdikcə daha geniş tətbiq olunur. Bu yanaşmalar tələbələrə daha fərdiləşdirilmiş öyrənmə təcrübəsi təqdim etməklə yanaşı, onların beynəlxalq resurslara çıxışını da asanlaşdırır. Cengiz Hakan Aydın həmçinin beynəlxalq tələbə mübadilə proqramlarının və ikili diplom imkanlarının genişləndirilməsinin əhəmiyyətini vurğulayıb.
İnnovasiya və Rəqəmsal İnkişaf Agentliyinin İqtisadi təhsil şöbəsinin müdiri Cavid Süleymanlı rəqəmsal iqtisadiyyatın formalaşmasında təhsilin rolundan bəhs edib.
Daha sonra “Code Academy”nin təsisçi direktoru Ülvi Aslanov müasir təhsil yanaşmalarında innovativ modellərin və süni intellektin rolundan danışıb.
Sonda III Milli Təhsil Zirvəsinin iştirakçılarına sertifikatlar təqdim edilib.
Bölmənin digər xəbərləri
