ELM VƏ TƏHSİL
Təhsildə şəffaflığın artırılmasına dair növbəti seminar
Bakı, 14 noyabr, AZƏRTAC
Paytaxt məktəblərində şəffaflığın artırılması istiqamətində seminarlar davam edir.
Bakı Şəhəri üzrə Təhsil İdarəsindən (BŞTİ) AZƏRTAC-a bildiriblər ki, paytaxtın Yasamal rayonu üzrə ümumtəhsil məktəblərini əhatə edən növbəti seminarda bu qurumun müvafiq struktur bölmə rəhbərləri, məktəb direktorları, müəllimlər, valideynlər və KİV nümayəndələri iştirak ediblər.
Tədbirdə çıxış edənlər təhsil sahəsində göstərilən elektron xidmətlərin sırasının kifayət qədər genişləndirilməsi və bu prosesin səmərəli şəkildə davam etdirilməsi nəticəsində subyektiv amillərin maksimum azaldılması və şəffaflığın genişləndirilməsinin təmin olunması ilə bağlı görülən işləri diqqətə çatdırıblar. Bildirilib ki, ümumtəhsil müəssisələrində pedaqoji, inzibati-idarəetmə və tədris köməkçi heyətin işə qəbulunun, uşaqların birinci sinfə və məktəbəhazırlıq qruplarına qəbulunun elektron sistem (www.mektebeqebul.edu.az) vasitəsilə aparılması, BŞTİ-nin tabeliyindəki lisey və gimnaziyaların V və VII siniflərinə şagird qəbulunun elektron qeydiyyat və müsabiqə yolu ilə həyata keçirilməsi, vətəndaşlarla iş və vətəndaş müraciətlərinə baxılması, səyyar qəbulların səmərəli aparılması, məktəb-valideyn əməkdaşlığının genişləndirilməsi və ictimaiyyətə açıqlığın təmin olunması məsələləri bunun bariz nümunələridir.
Sonda müvafiq mövzular ətrafında müzakirələr aparılıb, iştirakçıları maraqlandıran suallar cavablandırılıb.
Qeyd edək ki, BŞTİ tərəfindən keçirilən seminarların əsas məqsədi Azərbaycan Respublikası Prezidentinin 2016-cı il 27 aprel tarixli Sərəncamı ilə təsdiq edilmiş “Açıq hökumətin təşviqinə dair 2016-2018-ci illər üçün Milli Fəaliyyət Planı”nda nəzərdə tutulmuş tədbirlərin icrası çərçivəsində təhsil sahəsində korrupsiyaya qarşı mübarizənin gücləndirilməsi, şəffaflığın artırılması, müvafiq normativ-hüquqi sənədlərin tələblərinin bir daha diqqətə çatdırılması və bu baxımdan qarşıda duran məsələlərin müzakirəsindən ibarətdir.
Seminarların davam etdirilməsi nəzərdə tutulur.