ELM VƏ TƏHSİL
TƏLƏBƏ QƏBULU ÜZRƏ DÖVLƏT KOMİSSİYASI SUMQAYITDA ZONA MÜŞAVİRƏSİ KEÇİRMİŞDİR
Yanvarın 17-də Tələbə Qəbulu üzrə Dövlət Komissiyası (TQDK) Sumqayıtda ənənəvi zona müşavirəsi keçirmişdir.
AZƏRTAC-ın müxbiri xəbər verir ki, müşavirədə Abşeron, Xızı, Siyəzən, Quba, Xaçmaz, Qobustan, Şamaxı rayonlarının, sakinləri məcburi köçkünə çevrilmiş bölgələrin - Qubadlı, Zəngilan və Şuşanın, habelə Sumqayıt şəhəri təhsil şöbələrinin və orta təhsil müəssisələrinin rəhbərləri iştirak etmişlər.
TQDK sədrinin müavini Namiq Babayev çıxışında bildirmişdir ki, müstəqil Azərbaycanın inkişafının möhkəm əsaslarını ümummilli lider Heydər Əliyev qoymuşdur. Respublikamızın iqtisadiyyatın inkişafı sahəsində sabit liderliyi ulu öndərin seçdiyi və dövlətimizin başçısı İlham Əliyevin uğurla davam etdirdiyi xəttin səmərəliliyini aydın şəkildə nümayiş etdirir.
Müşavirədə ötən ilin yayında ali və orta ixtisas təhsili müəssisələrinə qəbul imtahanlarının nəticələri təhlil edilmiş, vəzifələr müəyyən olunmuşdur.
Sumqayıt abituriyentləri xüsusilə böyük uğurlar qazanmışlar. Onların nəticələri bir çox göstəricilər üzrə orta respublika göstəricilərindən yüksək olmuşdur. Sumqayıtın orta məktəblərini bitirən 4326 məzundan 91,93 faizi ali məktəblərə ərizə vermiş, 1315 nəfər, yəni sumqayıtlı abituriyentlərin 33,16 faizi tələbə adına layiq görülmüşdür. Onların 355 nəfəri 500-dən yuxarı, o cümlədən 99 nəfər 600-dən yuxarı bal toplamışdır. Diqqətəlayiq haldır ki, əlaçıların hamısı öz yüksək qiymətlərini təsdiq etmişlər.
Sakinləri məcburi köçkünə çevrilmiş rayonların orta məktəb məzunları da uğurlar qazanmışlar. Məsələn, Qubadlı rayonundan olan abituriyentlər yaxşı nəticələr göstərmiş, 465 məzundan təxminən 80 faizi ali məktəblərə ərizə vermiş, 106 abituriyent qəbul olunmuş, o cümlədən 14 nəfər 500-dən yuxarı bal toplamışdır.
Bölgələrin təhsil orqanları rəhbərlərinin diqqətinə diaqramlar təqdim olunmuşdur. Diaqramlarda məzunların hansı ixtisaslara və ali təhsil müəssisələrinə üstünlük verdikləri, abituriyentlərin ayrı-ayrı fənlər üzrə göstəriciləri, toplanmış balların faiz nisbəti, orta məktəblərin, ali təhsil ocaqlarının reytinqləri və bir çox başqa göstəricilər əksini tapmışdır.
Müşavirədə belə bir narahatlıq ifadə olunmuşdur ki, hələ də abituriyentlərinin 50 faizi 100-dək bal toplayan əlaçıların isə aşağı bilik səviyyəsi nümayiş etdirən bölgələr vardır.
Müasir telekommunikasiya texnologiyaları vasitəsilə müşavirə iştirakçılarına qəbul kampaniyasının müxtəlif cəhətlərinin müqayisəli xarakteristikası və ətraflı təhlili, habelə ayrı-ayrı fənlər üzrə korrelyasiya əmsalı təqdim olunmuşdur. Tədbir iştirakçıları ölkənin ali məktəblərinə qəbul şərtlərində edilmiş bəzi dəyişikliklərlə də tanış olmuşlar.
TQDK-nın nümayəndələri sonda müşavirə iştirakçılarının suallarına cavab vermişlər. Tədbirdə iştirak edənlərə respublikanın ali təhsil müəssisələrinə qəbul imtahanlarının yekunlarına dair materiallar toplanmış metodiki vəsait paylanmış, “Abituriyent” jurnalının xüsusi buraxılışı, habelə TQDK-nın hazırladığı disk təklif olunmuşdur.