TƏQSİRKARLAR CƏZALANDIRILMIŞLAR
Hadisənin səbəblərinin araşdırılması və onun nəticələrinin aradan qaldırılması üçün Azərbaycan Respublikası Prezidentinin Sərəncamı ilə yaradılmış Dövlət Komissiyası tərəfindən bütün zəruri tədbirlər həyata keçirilir.
Qəza ilə əlaqədar yanvar ayının 30-da Lənkəran şəhərinə gəlmiş dövlətimizin başçısı İlham Əliyevin göstərişlərinə əsasən, yaşayış binasının sakinlərinin köçürülməsi, həlak olanların ailələrinə, yaralananlara, qəza nəticəsində maddi ziyan dəymiş şəxslərə kompensasiyaların ödənilməsi və digər təxirəsalınmaz tədbirlərin görülməsi təmin edilmişdir.
Hadisə ilə bağlı dərhal Azərbaycan Respublikası Cinayət Məcəlləsinin 222.2-ci (tikinti, mədən işlərinin və sair işlərin aparılmasının təhlükəsizlik qaydalarını pozma), 222-1.2-ci (tikinti qaydalarını pozma) və 314. 2–ci (səhlənkarlıq) maddələri ilə cinayət işi başlanılmış, Baş Prokurorluq və Daxili İşlər Nazirliyinin əməkdaşlarından ibarət birgə istintaq qrupu yaradılmışdır.
Aparılmış araşdırmalarla müəyyən edilmişdir ki, birbaşa xidməti vəzifələrinin icrasına səhlənkarlıqla yanaşan Lənkəran Şəhər İcra Hakimiyyəti başçısının müavini Zakir Əhədov, icra başçısı aparatının memarlıq və tikinti şöbəsinin müdiri – şəhərin baş memarı Asəf Hüseynov və mənzil istismarı istehsalat-təmir müəssisəsinin rəisi Nicat Bağırov tərəfindən 2001-2003-cü illər və 2004-cü ilin yanvar ayı ərzində qanunvericiliyin tələbləri kobud surətdə pozularaq, mütəxəssislər dəvət edilməklə yaşayış binasının istismara yararlılıq vəziyyətinin öyrənilməsi və açıq–aşkar qəza vəziyyətində olan binanın təmiri üçün vaxtında zəruri tədbirlər görülməmişdir.
Həmiçinin bina sakinlərinin çoxsaylı kollektiv müraciətlərinə əhəmiyyət verilməmiş, uçma təhlükəsinin tam real olduğu 2003-cü ilin sonlarında sakinlərin təkidli tələblərinə baxmayaraq, onların köçürülməsi üçün heç bir iş görülməmişdir.
Azərbaycan Dövlət Tikinti və Arxitektura Komitəsi və “Azərdövlətlayihə” İstitutunun mütəxəssisləri tərəfindən ötən il noyabrın 22-də binaya baxış keçirilsə də, real vəziyyət tam öyrənilməmiş, binanın su ilə dolmuş zirzəmisi və bünövrəsi müayinə olunmadan formal akt tərtib edilmişdir. Nəticə etibarilə, binanın təmiri ilə əlaqədar həqiqəti əks etdirməyən layihə-smeta sənədləri hazırlanmış və sonradan həyata keçirilən təmir işlərinin gedişində isə sui-istifadə hallarına yol verilmişdir.
İstintaqla müəyyən edilmişdir ki, ötən il dekabrın 27-də Dövlət Tikinti və Arxitektura Komitəsinin Tikilməkdə Olan Obyektlərin Birləşmiş Müdiriyyətinin baş direktoru İlham Nəsirov vəzifə səlahiyyətlərindən şəxsi marağı naminə sui-istifadə edərək öz qardaşının adına təsis etdiyi, heç bir maddi-texniki bazaya və müvafiq ixtisaslı mütəxəssislərə malik olmayan Texniki Sənaye –Tikinti Məhdud Məsuliyyətli Cəmiyyətin müdiri Zeynal Şıxəliyev ilə həmin binada 64,5 milyon manatlıq təmir–tikinti işləri aparılması barədə müqavilə bağlamışdır. Bu yönümdə fəaliyyətə texniki nəzarətin həyata keçirilməsini isə həmin təşkilatın baş mühasibi və rəhbərlik etdiyi idarənin texniki nəzarətçisi olan qardaşı oğlu Vüsal Nəsirova həvalə etmişdir.
Zeynal Şıxəliyev və Vüsal Nəsirov tərəfindən bina sakinlərinin təhlükəsizliyinin təmini və onların köçürülməsi üçün lazımi tədbirlər görülmədən Bakı və Lənkəran şəhərlərindən müvafiq ixtisasa və təcrübəyə malik olmayan, təhlükəsizlik qaydalarına riayət edilməsi barədə təlimatlandırılmayan fəhlələr cəlb olunmuşlar. Cari il yanvarın 21-də isə təmir-tikinti işlərinə başlanılmış və məlum olduğu kimi, bundan 8 gün sonra – yanvarın 29-da təxminən saat 19.25-də binanın birinci bloku çökərək dağılmışdır. Qanun pozuntularına və vəzifə səhlənkarlığına yol verdiklərinə görə Baş Prokurorluğun təqdimatına əsasən, Lənkəran Şəhər İcra Hakimiyyəti başçısının müavini – şəhər təsərrüfatı şöbəsinin müdiri Zakir Əhədov, Mənzil Təmir Tikinti İstismar-İstehsalat Müəssisəsinin rəisi Nicat Bağırov və şəhər icra hakimiyyətinin memarlıq və tikinti şöbəsinin müdiri, baş memar Asəf Hüseynov tutduqları vəzifələrdən azad edilmişlər.
Dövlət Tikinti və Arxitektura Komitəsinin Tikilməkdə Olan Obyektlərin Birləşmiş Müdiriyyətinin baş direktoru İlham Nəsirov Azərbaycan Respublikası Cinayət Məcəlləsinin 308.2–ci (vəzifə səlahiyyətlərindən sui-istifadə), Texniki Sənaye-Tikinti Məhdud Məsuliyyətli Cəmiyyətin direktoru Zeynal Şıxəliyev və həmin müəssisənin baş mühasibi, eyni zamanda, Dövlət Tikinti və Arxitektura Komitəsinin Tikilməkdə Olan Obyektlərin Birləşmiş Müdiriyyətinin texniki nəzarətçisi Vüsal Nəsirov isə Cinayət Məcəlləsinin 222.2–ci (tikinti işlərinin aparılmasının təhlükəsizlik qaydalarını pozma) maddələri ilə təqsirləndirilən şəxs qismində cəlb olunmaqla barələrində həbs qətimkan tədbiri seçilmişdir.
Hazırda respublika Baş Prokurorluğu və Daxili İşlər Nazirliyinin birgə istintaq qrupu tərəfindən ibtidai araşdırma davam etdirilir.
Qəzanın bütün xüsusatlarının araşdırılması və bunda təqsirkar olan digər şəxslərin müəyyən edilib cinayət məsuliyyətinə cəlb olunması üçün zəruri tədbirlər görülür.
Bölmənin digər xəbərləri
