REGİONLAR
Tərtərdə “Ehtiyatlara qənaət edən kənd təsərrüfatı” layihəsi ilə əlaqədar seminar keçirilmişdir
Tərtər, 2 fevral (AZƏRTAC). Tərtər rayonunda BMT-nin Ərzaq və Kənd Təsərrüfatı Təşkilatının (FAO), Quraq Ərazilərdə Kənd Təsərrüfatı Tədqiqatları üzrə Beynəlxalq Mərkəzin (İCARDA) birgə həyata keçirdiyi “Ehtiyatlara qənaət edən kənd təsərrüfatı” layihəsi ilə əlaqədar seminar keçirilmişdir.
AZƏRTAC xəbər verir ki, əvvəlcə tədbir iştirakçıları Tərtər bölgə təcrübə stansiyasında yeni gətirilmiş kənd təsərrüfatı texnika və avadanlıqları ilə tanış olmuşlar.
Seminarda İCARDA-nın nümayəndəsi Əziz Nurbekov, Azərbaycan Elmi-Tədqiqat Əkinçilik İnstitutunun əməkdaşı İmran Cümşüdov, Azərbaycan Elmi-Tədqiqat Eroziya və Suvarma İnstitutunun direktoru Seymur Səfərli, Azərbaycan Elmi-Tədqiqat Aqromexanika İnstitutunun direktoru Kamil Fətəliyev, Aqro İnformasiya Mərkəzinin nümayəndəsi Zülfü İsmayılov və başqaları çıxış edərək resurslara qənaət edən texnologiyanın tətbiqi, dənli bitkilərin tirəli səpin üsulu, yeni texnologiya ilə səpinlərin suvarılması və s. danışılmışdır.
Bildirilmişdir ki, payızlıq buğdanın tirəli səpin üsulu və sıfır becərmə ilə əkilməsi adi üsulla müqayisədə aqrotexniki və iqtisadi baxımdan daha səmərəlidir. Bu zaman toxuma 35 faiz, suvarma suyuna 30 faiz qənaət olunur, torpaqda nəmlik uzun müddət qalır, verilən gübrənin səmərəliliyi artır, bitkilərin azotu mənimsəməsi yüksəlir, xəstəlik və zərərvericilərin inkişafı üçün qeyri-əlverişli şərait yaranır, fermerin əməyi yüngülləşir, əkin xərcləri 2 dəfə azalır.
Vurğulanmışdır ki, buğda biçini başa çatdıqdan sonra həmin sahələrə konservasiyalı kənd təsərrüfatına əsaslanmaqla heç bir şumlama aparılmadan qarğıdalı, soya və digər bitkilər əkilir. Torpaqlardan səmərəli istifadə edilməsi məqsədilə aparılan bu üsulla bir ildə eyni torpaqdan iki dəfə məhsul götürülür.
Daha sonra tədbir iştirakçıları yeni texnologiyaların tətbiq edildiyi və ənənəvi üsulla becərilən sahələrə baxış keçirmişlər.