REGİONLAR
Tərtərdə kənd təsərrüfatının inkişafı ilə bağlı qarşıda duran vəzifələr müzakirə olunub
Tərtər, 17 iyun, Tahir Ağaməmmədov, AZƏRTAC
Tərtərdə keçirilən müşavirədə kənd təsərrüfatının inkişafı ilə bağlı qarşıda duran vəzifələr müzakirə edilib.
AZƏRTAC-ın bölgə müxbiri xəbər verir ki, yerli icra nümayəndələri, bələdiyyə sədrləri, idarə, müəssisə, təşkilat rəhbərləri, kənd təsərrüfatı mütəxəssisləri, fermerlər və ictimaiyyət nümayəndələrinin iştirak etdiyi müşavirədə rayonda kənd təsərrüfatı sahəsində görülən işlərdən və qarşıda duran vəzifələrdən danışılıb. Bildirilib ki, Prezident İlham Əliyevin respublikada kənd təsərrüfatının və sahibkarlığın inkişafı, yerli istehsalın artırılması, idxaldan asılılığın azaldılması, əhalinin məşğulluğunun yüksəldilməsi, torpaq sahələrindən səmərəli istifadə olunması barədə tapşırıqları Tərtər rayonunda uğurla icra olunur.
Diqqətə çatdırılıb ki, rayon ərazisində bu günə kimi 9 min 447,7 hektar sahədə yazlıq əkin işləri aparılıb. Buğda və şəkər çuğunduru istehsalına görə ötən illər respublikada ön sıralarda gedən tərtərli əkinçilər bu il də yüksək məhsul əldə etməyi qarşılarına məqsəd qoyublar. Belə ki, keçən il 7 min 545,6 hektar buğda sahəsindən 30 min 984,4 ton, 859 hektar şəkər çuğunduru sahəsindən 29 min 928 ton məhsul əldə edilib. Buğdanın orta məhsuldarlığı 41,1 sentner, şəkər çuğundurunun orta məhsuldarlığı 378,1 sentner olub. Bu il isə 7 min 87,9 hektar sahədə buğda, 682,5 hektar sahədə şəkər çuğunduru əkilib. Əkin və becərmə işlərinin aqrotexniki qaydalara düzgün əməl olunaraq aparıldığı üçün sahələrdə bol məhsul yetişib.
Bildirilib ki, 2017-ci ildə 3 min 123 hektar sahədən 8 min 419,9 ton məhsul tədarük edərək orta məhsuldarlığa görə respublikanın pambıqçılıq rayonları arasında ön sırada dayanan Tərtər pambıqçıları ötən il də yüksək nəticəyə nail olublar. Belə ki, keçən il 3 min 300 hektar sahədən 8 min 196,5 ton məhsul tədarük edilib. Hər hektar pambıq sahəsində orta məhsuldarlıq 24,8 sentner olub. 2014-2018-ci illərdə Tərtər rayonunda pambığın əkin sahəsi 3,6 dəfə, məhsul istehsalı 4,1 dəfə, hər hektardan məhsuldarlıq 13,2 faiz artıb. Cari ilin məhsulu üçün rayonda 3 min 427 hektar sahədə pambıq səpini aparılıb. Hazırda becərmə işləri görülür.
Rayonda ənənəvi təsərrüfat sahələrindən olan baramaçılığın inkişafı istiqamətində də müvafiq işlər görülüb. Son üç ildə rayon ərazisində 223 min 357 ədəd çəkil tingi əkilib. Ötən il rayon üzrə 10,2 ton barama istehsal olunub. Bu il isə kümçülərə 500 qutu ipək qurdu verilib, 20 tondan çox barama istehsalı nəzərdə tutulur. İndiyədək 14,3 ton barama “Azəripək” MMC-yə təhvil verilib. Hazırda barama qəbulu davam edir.
Tədbirdə əkin sahələrinin mineral gübrələr, dərmanlar, herbisid, pestisidlərlə təminatı, suvarma məsələləri, texnika ilə təminat kimi məsələlər ətrafında fikir mübadiləsi aparılıb. Taxıl biçini zamanı təhlükəsizlik tədbirləri, xüsusilə də yanğın hadisələrinin qarşısının alınması üçün müvafiq tədbirlərin görülməsi, texnikanın hazırlıq vəziyyəti müzakirə olunub, taxıl biçininin vaxtında və itkisiz başa çatdırılması üçün aidiyyəti qurumlara müvafiq tapşırıqlar verilib.