Tərtər, 13 iyun (AZƏRTAC). Elmi-Tədqiqat Əkinçilik İnstitutunun Tərtər Bölgə Təcrübə Stansiyasında akademik Cəlal Əliyevin 85 illik yubileyinə həsr olunmuş “Taxılçılıqda yeni sortlar və müasir becərmə texnologiyaları” mövzusunda ümumrespublika tarla müşavirəsi keçirilmişdir.

AZƏRTAC xəbər verir ki, tədbirdə Kənd Təsərrüfatı Nazirliyi Aqrar Elm Mərkəzinin, Respublika Dövlət Toxum Müfəttişliyinin, Elmi- Tədqiqat Əkinçilik İnstitutunun əməkdaşları, ərazi kənd təsərrüfatı idarələrinin, regional aqrar elm mərkəzlərinin nümayəndələri, ətraf rayonların toxum müfəttişləri, bitki mühafizə stansiyalarının rəisləri, Dövlət Aqrar Universitetinin tələbələri, taxıl toxumçuluğu ilə məşğul olan qabaqcıl fermerlər iştirak etmişlər.

Müşavirədə çıxış edən kənd təsərrüfatı naziri İsmət Abasov dünya şöhrətli alim, ictimai-siyasi xadim, akademik Cəlal Əliyevin aqrar elmə, xüsusilə taxılçılığın inkişafına verdiyi misilsiz töhfələr, müəllifi olduğu və respublikada geniş əkin sahəsi tutan onlarla taxıl sortları, “2008-2015-ci illərdə Azərbaycan Respublikasında əhalinin ərzaq məhsulları ilə etibarlı təminatına dair Dövlət Proqramı”ndan irəli gələn məsələlər və qarşıda duran vəzifələr, ölkə əhalisinin ərzağa olan tələbatının daxili istehsal hesabına ödənilməsi, Prezident İlham Əliyevin aqrar sahənin inkişafına göstərdiyi diqqət və qayğıdan danışmışdır. Bildirmişdir ki, akademik Cəlal Əliyevin seleksiya işlərinə kompleks yanaşması nəticəsində Elmi-Tədqiqat Əkinçilik İnstitutunda 100-dən çox taxıl sortları yaradılmışdır ki, onlardan da 63-ü seleksiya nailiyyətlərinin sınağı və mühafizəsi üzrə Dövlət Komissiyasının reyestrinə daxil edilmişdir.

Qeyd olunmuşdur ki, kənd təsərrüfatının ən mühüm strateji sahələrindən olan taxılçılığın inkişafı Prezident İlham Əliyevin nəzarətindədir. Məhz bunun nəticəsidir ki, Aqrar Elm Mərkəzi sisteminə daxil olan elmi-tədqiqat institutları və regional aqrar elm mərkəzləri tərəfindən 2004-cü ildə 345,4 ton orijinal, superelit və elit toxumlar istehsal edildiyi halda, 2012-ci ildə bu göstərici 1819,3 tona çatdırılmışdır.

İqlim dəyişikliyi şəraitində resurs mühafizəedici texnologiyaların əhəmiyyətindən danışan Aqrar Elm Mərkəzinin baş direktoru Əsəd Musayev suvarma şəraitində dənli bitkilərin becərilməsində tirəli səpin texnologiyasının iqtisadi cəhətdən üstünlüklərini, sıfır becərmə texnologiyasının ikinci məhsulun alınmasında, gecikmiş payızlıq taxıl səpinlərində əhəmiyyətini tədbir iştirakçılarının diqqətinə çatdırmış və öz tövsiyələrini vermişdir.

Əkinçilik İnstitutunun direktoru Cavanşir Təlai müşavirə iştirakçılarına son illər akademik Cəlal Əliyevin rəhbərliyi ilə məqsədyönlü seleksiyada zona prinsipləri əsasında yaradılmış yeni taxıl sortları, onların bioloji xüsusiyyətləri, potensial məhsuldarlığı və respublikada geniş əkin sahələrinə malik olmaları barədə ətraflı məlumat vermişdir.

Müşavirədə çıxış edən fermerlər aqrar sahənin inkişafına göstərdiyi diqqət və qayğıya görə Prezident İlham Əliyevə minnətdarlıqlarını bildirmişlər.

Sonra müşavirə iştirakçıları Tərtər Bölgə Təcrübə Stansiyasında tətbiq edilmiş yeni sort və texnologiyalara baxış keçirmişlər.

Məlumat verilmişdir ki, ənənəvi üsuldan fərqli olaraq taxıl “tirə” üsulu ilə əkin zamanı toxuma qənaət olunur, torpaqda nəmlik uzun müddət qalır, su məsrəfi azalır. Buğda biçini başa çatdıqdan sonra həmin sahələrə heç bir şumlama aparılmadan qarğıdalı, soya və digər bitkilər əkilir. Torpaqlardan səmərəli istifadə edilməsi məqsədi ilə aparılan bu üsulla bir ildə eyni torpaqdan iki dəfə məhsul götürülür.

Sonra lazer mala texnikasına, sıfır, minimal (diskləmə) və ənənəvi üsulla sələf olan qarğıdalı sahəsində becərilmiş arpadan sonra ikinci məhsul üçün soya, qarğıdalı, günəbaxanın əkilməsi nümayiş olunmuşdur.

Müşavirənin sonunda nazir, alimlər və fermerlər arasında fikir mübadiləsi aparılmışdır.