Bakı, 29 yanvar (AZƏRTAC ). “Holcim-Azərbaycan” şirkəti dünyanın aparıcı sement təchizatçılarından olan “Holcim qrupu”nun bir hissəsidir. 1912-ci ildə İsveçrədə təsis edilmiş qrup 70-dən çox ölkədə böyük və kiçik sərmayə paylarına malik aparıcı qlobal şirkətə çevrilmişdir. Bu şirkət Azərbaycanda klinker və sement istehsal edən ən iri müəssisədir. Onun yerli və beynəlxalq standartlara cavab verən yüksək keyfiyyətli məhsulları ölkədaxili tələbatın əksər hissəsini ödəyir. Hazırda “Holcim-Azərbaycan”nın istehsal etdiyi sementdən irimiqyaslı tikinti işlərində və qlobal enerji layihələrinin həyata keçirilməsində geniş istifadə olunur.

2014-cü ilin Prezident İlham Əliyevin müvafiq Sərəncamına əsasən “Sənaye ili” elan edilməsi ilə əlaqədar şirkətin Baş direktoru Rossen Papazov ölkə sənayesinin inkişafında özünəməxsus rolu olan “Holcim-Azərbaycan” müəssisəsinin fəaliyyəti və həyata keçirdiyi layihələr barədə AZƏRTAC-ın müxbirinə müsahibə vermişdir. R.Papazov demişdir:

- “Holcim-Azərbaycan” şirkəti respublikada yeganə klinker

istehsalçısıdır. Sement istehsalı üçün yüksək keyfiyyətli klinker tələb olunur və şirkət istehsal prosesi zamanı ətraf mühit amilini diqqət mərkəzində saxlayır. Bu məqsədlə “Holcim-Azərbaycan” ənənəvi istehsal prosesi ilə yanaşı, daim alternativ mənbələr axtarışındadır.

Məsələn, əsas xammal kimi yararsız əhəng daşından istifadə edirik və bu, daş karxanalarında yaranan tullantıların təmizlənməsinə, eləcə də təbii resursların qorumasına öz müsbət təsirini göstərir. Şlam, dəmir filizi, dəmir yanığı, boksit tullantıları, çirkab və kanalizasiya suları da potensial alternativ xammal resursları sırasındadır. Bu fəaliyyətlər Azərbaycanda ətraf mühitə müsbət təsir göstərir və təbii resurslara qənaət etməklə cəmiyyətə tullantıların təkrar istifadəsini təşviq edir.

“Holcim-Azərbaycan” respublikanın inkişafında mühüm əhəmiyyət kəsb edən layihələrdən də kənarda qalmır. Şirkət Bakı Gəmiqayırma zavodunun, Olimpiya stadionun tikintisini və digər iri layihələri yüksək keyfiyyətli sementlə təchiz edir.

Diqqətə çatdırmaq istərdim ki, şirkətimiz Bakı-Ələt Dəniz Limanının tikintisində, “Yaşıl şəhər” və digər layihələrdə iştirak etməyi nəzərdə tutmuşdur.

Tikinti sənayesində daim öz yenilikləri ilə fərqlənən “Holcim” Azərbaycanda ilk dəfə olaraq “Holcim Sement Mərkəzi” yaratmışdır. Hədəfimiz müştərilərə daim yenilənən məhsullar və yüksək xidmətlər təqdim etməkdir. Mərkəzdə bir çox tədbirlər və təlimlər həyata keçirilir. Bu il sement və beton sənayesinə aid silsilə təlimlər təşkil olunacaqdır.

Əlbəttə ki, şirkətin fəaliyyəti bununla məhdudlaşmır. “Holcim- Azərbaycan” sosial sahədə də fəaldır. İdman, mədəniyyət, təhsil, sağlamlıq, infrastruktur və xeyriyyəçilik sahəsində 400-ə yaxın layihə həyata keçirmişdir.

Məsələn, şirkətin Qaradağ rayonunun Ümid qəsəbəsində Gənclərin İnkişafı Mərkəzinin inşa edilməsini buna misal göstərmək olar. Yaxın aylarda mərkəzin rəsmi açılışı gözlənilir. Digər uğurlu layihələrdən biri də Sahil qəsəbəsində yaradılan Məşğulluq Məsləhət Mərkəzidir. Mərkəzin fəaliyyəti nəticəsində 193 nəfər işlə təmin olunmuş, 62 nəfərə müavinət almaqda kömək göstərilmişdir.

Bununla yanaşı, “Global Holcim” şirkəti tərəfindən “Holcim” Fondu təsis olunmuşdur və Azərbaycanda növbəti dəfə olaraq “Holcim Mükafatları - Davamlı İnkişaf üçün İnşaat” beynəlxalq müsabiqəsinə sənəd qəbulu elan etmişdir. Müsabiqənin məqsədi inşaat sahəsində ənənəvi meyllərdən kənara çıxan, ətraf mühit, sosial və iqtisadi göstəriciləri nümayiş etdirən layihələri dəstəkləməkdədir.