SİYASƏT
Toledo Universitetində Azərbaycan haqqında məlumat verilmişdir
Vaşinqton, 13 mart (AZƏRTAC). Azərbaycanın ABŞ-dakı səfiri Elin Süleymanov Ohayo ştatının Toledo şəhərinə səfəri çərçivəsində məzunu olduğu Toledo Universitetinin professor-tələbə heyəti qarşısında çıxış etmişdir. Toledo Universitetinin məzunu olmuş ilk azərbaycanlı kimi bu ali təhsil ocağında yenidən olmağından məmnunluğunu bildirən səfir ABŞ ilə ilk tanışlığının Toledo şəhərindən başlanmasının Amerika cəmiyyətinin öyrənilməsi baxımından əhəmiyyətli olduğunu qeyd etmişdir.
Diplomat çıxışında Azərbaycanın coğrafi mövqeyinin ölkənin xarici siyasət istiqamətləri və xarakterinin formalaşmasına təsiri barədə məlumat vermiş, regional sabitliyin əsasında region dövlətləri arasında qarşılıqlı faydalı münasibətlərin dayandığını demişdir. Bu xüsusda, Azərbaycanın öz qonşuları Gürcüstan və Türkiyə ilə əlaqələrinin nümunəvi olduğunu qeyd etmişdir. Azərbaycanın şərqdən Xəzər dənizi ilə sərhədlənməsinin siyasi və strateji üstünlüklərindən bəhs edən səfir bu mənada, ilk olaraq, zəngin enerji resurslarına çıxış imkanını qeyd etmişdir. E.Süleymanov hazırda regional sabitliyin əsasında məhz ümummilli lider Heydər Əliyevin uzaqgörən siyasi iradəsinin ifadəsi olan qərarlar nəticəsində reallaşdırılmış enerji layihələrinin dayandığını bildirmişdir.
E.Süleymanov gündəmdə olan enerji layihələri, xüsusilə TANAP layihəsi barəsində məlumat vermişdir. Hazırda enerji sahəsində əsas prioritetin təbii qazın nəqli olduğunu bildirən səfir Avropanın enerji təhlükəsizliyinin təminində Azərbaycanın rolundan danışmışdır. ABŞ-ın “Cənub dəhlizi” layihəsinə dəstəyini ifadə etməsinin müsbət hal olduğunu bildirən E.Süleymanov bunun gələcəkdə də davam etdirilməsinə ümidvar olduğunu vurğulamışdır.
Azərbaycanın terrorçuluğa qarşı mübarizədə fəal iştirakından bəhs edən səfir bu xüsusda Şimal Paylayıcı Şəbəkə daxilində ölkəmizin rolu barədə geniş məlumat vermiş və Əfqanıstana gedən qeyri-hərbi yüklərin 40 faizdən çoxunun Azərbaycan ərazisindən keçdiyini diqqətə çatdırmışdır. Regional əməkdaşlığın inteqrasiya proseslərinin əsasında dayandığını qeyd edən diplomat Azərbaycan tərəfindən irəli sürülən təşəbbüslərin yalnız maddi mənfəətlə məhdudlaşmadığı, eyni zamanda, uğurlu regional məkan qurulmasına xidmət etdiyini bildirmişdir. O, Azərbaycanın qonşu dövlətlərlə, Türkiyə və Gürcüstanla əməkdaşlığının qarşılıqlı fayda verməsini və hər üç dövlətin sonrakı iqtisadi inkişafına töhfəsinin danılmaz fakt olduğunu əlavə etmişdir.
Diplomat regionun hərtərəfli inkişafında əsas maneənin Ermənistan-Azərbaycan, Dağlıq Qarabağ münaqişəsinin olduğunu bildirərək, Ermənistanın işğalçılıq siyasətinə son qoyması ilə bu layihələrə cəlbinə heç bir əngəl olmadığını diqqətə çatdırmışdır. Ermənistan hakimiyyətinin münaqişənin nizamlanmasında tutduğu qeyri-konstruktiv mövqenin həm dövlətin regional inteqrasiya proseslərindən kənar qalması, həm də erməni xalqının yaşayışının gündən-günə pisləşməsi ilə nəticələndiyini təəssüflə qeyd etmişdir. Ermənistanda rəsmi siyasi dairələrin müstəqil siyasət apararaq, erməni xalqının mənafeyini ön plana çəkəcəkləri halda, münaqişənin nizamlanmasının həm dövlət, həm də xalq üçün faydasını dərk etmiş olacağını vurğulamışdır.
Səfirin universitetdə çıxışı barədə şəhərin “Toledo Blade” qəzetində məqalə dərc edilmişdir.
Yusif Babanlı
Vaşinqton