TOVUZDA QASIRĞA
Rayon fövqəladə hallar komissiyasının sədri Niftalı Qasımov AZƏRTAC-ın müxbirinə bildirmişdir ki, qasırğa kənd evlərinin dam örtüyünü dağıtmış, bəzi tikililəri uçurmuş, elektrik və rabitə dirəklərini aşırmış, xəstəxana, məktəb, klub və digər xidmət binalarına, habelə, rayonun əkin sahələrinə, şitilliklərə böyük maddi ziyan vurmuşdur.
Dondar Quşçu və Ağdam kəndlərində təbii fəlakət nəticəsində iki şəxsi ev yanmışdır. Tovuz şəhərinə və şəhərə bitişik kəndlərdən də qasırğa yan ötməmiş, yaşayış evlərinə, şəxsi təsərrüfatlara ciddi ziyan dəymişdir. Qasırğa başlayan saatlardan rayon üzrə fövqəladə hallar komissiyasının üzvləri təcili toplaşaraq təbii fəlakətin nəticələrinin aradan qaldırılması, dəyən ziyanın müəyyənləşdirilməsi məqsədi ilə vəzifə bölgüsü aparmışlar. Rayon İcra Hakimiyyətinin məsul işçiləri, digər səlahiyyətli strukturların nümayəndələri kəndlərə gedərək vəziyyətlə yerində tanış olur, dəymiş ziyanın həcmini müəyyənləşdirirlər.
Hazırda rayonda normal iş ahəngi bərpa olunmuşdur və kəndlərlə müntəzəm əlaqə saxlanılır, həyat öz axarı ilə davam edir.
Bölmənin digər xəbərləri
