TÜRK ALİMİNİN İXTİRASI
İTAR-TASS-ın verdiyi xəbərə görə, türk alimi Əli Ərdəmir almazdan möhkəm material ixtira etmişdir. Alimin fikrincə, bu materialın əməli tətbiqi sayəsində “kosmos sənayesində və avtomobil sənayesində əsl inqilab baş verəcəkdir”.
Çikaqonun elmi mərkəzlərindən birində işləyən Ərdəmir söhbətin konkert olaraq hansı ixtiradan getdiyini dəqiqləşdirməkdən boyun qaçırmışdır. O, Türkiyənin “Axşam” qəzetinə müsahibəsində demişdir: “2002-ci ilin sonunadək siz çox möhkəm, ifrat keçiricilik qabiliyyətinə malik, ideal şəkildə hamar, sürtünmə qüvvəsini, əslində, heçə endirən və xarici təsirə məruz qalmayan yeni materialla tanış olacaqsınız”. Ərdəmirin sözlərinə görə, ondan kəsici alətlərin səthini örtmək üçün, habelə metal hissələrin və mühərriklərin, o cümlədən raket mühərriklərinin korroziyadan və oksidləşmədən qorunması üçün istifadə etmək olar.
“Axşam” qəzeti yazır ki, türk aliminin yekun mərhələsində olan eksperimentlərinin gedişini ABŞ-ın Milli Aeronavtika və Kosmik Fəzanın Tədqiqi Agentliyində diqqətlə izləyirlər.
Bölmənin digər xəbərləri
