TÜRKİYƏ ABŞ-A NOTA VERMİŞDİR
AZƏRTAC-ın xüsusi müxbiri xəbər verir ki, mayın 29-da ABŞ-ın Ankaradakı səfirliyinin müşaviri Türkiyənin Xarici İşlər Nazirliyinə dəvət olunmuş və ona bu dövlətin hərbi təyyarələrinin Türkiyənin hava sərhədlərini pozması ilə bağlı nota təqdim edilmişdir.
Türkiyə XİN-in mətbuat katibi Ləvənd Bilman jurnalistlərə bildirmişdir ki, mayın 24-də İraq ərazisindən qalxan ABŞ Hava Qüvvələrinə aid iki F-16 tipli hərbi təyyarənin türk hava sərhədlərini pozaraq 4 dəqiqə cənub-şərq istiqamətində uçması ilə bağlı Türkiyə Silahlı Qüvvələri Baş Qərargahından geniş məlumat alınmışdır. Buna bənzər hadisələrin bir daha təkrarlanmaması üçün Vaşinqtona nota verilmişdir.
ABŞ Dövlət Departamentinin nümayəndəsi Tom Keyzi isə, bu məsələnin Birləşmiş Ştatların Müdafiə Nazirliyi tərəfindən araşdırıldığını, hadisənin təsadüfən və pilotların səhvi üzündən baş verdiyini söyləmişdir. O bildirmişdir ki, ABŞ Türkiyənin suverenliyinə və hava sərhədlərinə çox böyük hörmətlə yanaşır.
Bölmənin digər xəbərləri
