TÜRKİYƏ PREZİDENTİ ABDULLAH GÜLÜN NİTQİ
-Hörmətli Prezident,
dəyərli dostum,
hörmətli xanıməfəndi,
xanımlar və bəylər!
İlk növbədə, hamınıza “Xoş gəlmisiniz!” deyirəm.
Dəyərli dostumuz hörmətli İlham Əliyev yenidən Prezident seçildikdən sonra ilk rəsmi səfərini Türkiyəyə edir. Bununla bağlı böyük xoşbəxtlik, böyük qürur hissi keçiririk. Göstərdiyi bu yaxın münasibətdən ötrü bir daha ona təşəkkürümü bldirirəm. Həm zati-alilərinə, həm xanımına, həm də bütün azərbaycanlı dostlarımıza bir daha “Xoş gəlmisiniz!” deyirəm.
Hörmətli Prezidentimiz ikinci dəfə bu vəzifəyə seçilmişdir. Bunu biz də böyük bir sevinclə izlədik. Bu münasibətlə zati-alilərini bir daha təbrik edirəm, həm Azərbaycan, həm bütün türk dünyası, həm də bölgəmiz və dünya üçün xeyirli olmasını diləyirəm, ona uğurlar arzu edirəm.
Azərbaycan müstəqil olduqdan sonra sabit və diqqətli siyasəti ilə bütün dünyada böyük hörmət qazanmışdır. Burada hörmətli Heydər Əliyevi rəhmətlə anırıq. O, Azərbaycanın gələcəyini ən mükəmməl şəkildə müəyyən etdiyi kimi, Türkiyə və Azərbaycan arasındakı əlaqələri də ən dəqiq ifadə etmiş, biz “bir millət, iki dövlətik” demişdir. Bu anlayış və təfəkkür çərçivəsində Azərbaycan və Türkiyə yollarına davam etməkdədir. Hörmətli İlham Əliyev də Azərbaycanı eyni şəkildə bu istiqamətdə irəli aparmışdır. Bu gün Azərbaycan daha da çiçəklənmiş, daha qüdrətli, Silahlı Qüvvələri, iqtisadiyyatı, demokratiyası daha güclü bir dövlətdir. Biz bütün bunlarla fəxr edirik.
Türkiyə ilə Azərbaycan arasındakı əlaqələr bir millət olmaq anlayışı çərçivəsində həm siyasi, həm iqtisadi, həm də mədəni sahələrdə ən mükəmməl şəkildə davam etməkdədir. Siyasi məsləhətləşmələrimiz ən yüksək səviyyədə həyata keçirilir. Ən yüksək səviyyədə səfərlər edilir. Hörmətli prezidentlərimiz, baş nazirlərimiz, nazirlərimiz, yeri gəldikdə, protokoldan da xaric görüşlər keçirərək, qəlbdən-qəlbə necə bağlı olduğumuzu da nümayiş etdirirlər.
Xüsusilə bu günlərdə, Qafqazdakı son hadisələrdən sonra Türkiyə və Azərbaycan bölgədə yeni bir mövqe nümayiş etdirməkdə, sabitliyin və sülhün bərqərar olması üçün böyük səy göstərməkdədir. Türkiyənin Qafqazda Sabitlik və Əməkdaşlıq Platforması təşəbbüsünə ən güclü və ilk dəstəyi Azərbaycan vermişdir. Hörmətli Prezident və dəyərli dostumuz bugünkü mətbuat konfransında bunu bir daha təsdiq etmişdir. Şübhəsiz ki, Qafqazda sülh, sabitlik və əmin-amanlığın olması üçün Dağlıq Qarabağ probleminin sülh yolu ilə, ədalətli və hüquqi zəmin əsasında, Birləşmiş Millətlər Təşkilatının prinsipləri çərçivəsində həll olunması lazımdır. Son vaxtlar Qafqazda meydana gələn müsbət atmosfer, qarşılıqlı görüşlər yeni bir ab-havanın yaranmasının da əlamətidir. Ümidvarıq və inanırıq ki, bu gözəl ab-havada bütün problemlər sülh yolu ilə həll olunacaq və bütün ölkələr bir-biri ilə daha sıx əməkdaşlıq edəcəkdir.
Biz Azərbaycanla iqtisadi sahədə də çox böyük layihələri həyata keçirmişik. Bəzilərinin vaxtilə “bu, əfsanədir, həyata keçməz” dedikləri Bakı-Tbilisi-Ceyhan neft boru kəməri bir ildən çoxdur, böyük uğurla fəaliyyət göstərməkdə, Qafqazın və Orta Asiyanın nefti bu kəmər vasitəsilə bütün dünyaya nəql olunmaqdadır. Bakı-Tbilisi-Ərzurum boru xətti də uğurla fəaliyyət göstərir. Hamımızın birlikdə təməlini qoyduğumuz Bakı-Tbilisi-Qars dəmir yolunun da ən qısa müddətdə tamamlanacağına və beləliklə, nəqliyyatın daha asanlaşacağına ümid edirik. Bu istiqamətdə Azərbaycan, Türkiyə və Gürcüstan çox böyük iş görür. Azərbaycanın Türkiyəyə sərmayə qoymasını böyük bir təqdirlə qarşılayırıq. Xüsusilə, özəlləşdirmə proqramlarına göstərdiyi maraq Türkiyə tərəfindən də dəstəklənməkdədir. Eyni zamanada, türk iş adamlarının, inşaatçıların Azərbaycandakı fəaliyyətlərinə göstərdikləri dəstəyə görə, yaratdığınız şərait və etimad üçün də təşəkkürümü bildirirəm.
Ticarətimizin getdikcə artdığını görməkdən də böyük bir məmnunluq duyuruq.
Mədəniyyət sahəsindəki əlaqələrimiz də çox təbiidir. Azərbaycan türkdilli dövlətlərin zirvə toplantılarına ən çox önəm verən və maraq göstərən ölkədir. Türkdilli dövlətlərin qarşıdakı zirvə toplantısını Azərbaycanda keçirəcəyik. Parlamentlərin sədrləri isə yaxın vaxtlarda Türkiyədə toplaşacaqlar. Azərbaycan bu istiqamətdəki fəaliyyətlərə çox böyük dəstək verir. Bundan böyük məmnunluq duyuruq və Sizə minnətdarıq.
Mən bu səfərin mühüm bir zamanda həyata keçirildiyini vurğulamaq istəyirəm. Qafqazda baş vermiş bütün hadisələrdən sonra bu gün təkrar çox mühüm bir məsləhətləşmə apardıq, bütün məsələləri müzakirə etdik. Bir daha gördük ki, bütün məsələlərdə Azərbaycan və Türkiyə ortaq bir mövqeyə malikdir və böyük bir həmrəyilk nümayiş etdirir.
Bu səfəriniz dostluğumuzu və qardaşlığımızı daha da möhkəmləndirmiş, gücləndirmişdir. Sizə bir daha “Xoş gəlmisiniz!” deyirəm. Bütün azərbaycanlı qardaşlarımıza türk qardaşlarının məhəbbətlərini, sevgi və salamlarını çatdırıram.
Badəmi Sizin uğurunuz şərəfinə qaldırıram.
######
Bölmənin digər xəbərləri
