Ankara, 30 avqust, AZƏRTAC

Avqustun 30-u Türkiyədə Zəfər bayramı və Silahlı Qüvvələr Günü qeyd olunur. Türkiyə xalqının yaddaşına “bir millətin azadlıq günü!” kimi həkk olunan 30 avqust tarixi hər bir türkün qürur mənbəyi, iftixar yeridir. Qazi Mustafa Kamal Atatürkün liderliyi ilə qurulub böyük bir inkişaf yolu keçən yeni və müasir Türkiyə Cümhuriyyətin yüz illiyinə dövlətçiliyin dinamik gücünün yüksəlişi ilə hazırlaşır.

AZƏRTAC xəbər verir ki, Prezident Rəcəb Tayyib Ərdoğan 30 avqust-Zəfər bayramı və Silahlı Qüvvələr Günü münasibətilə qəhrəman türk xalqına ünvanlandığı müraciətində əminliklə qeyd edib ki, Cümhuriyyətimizin 100-cü ildönümünü qeyd edəcəyimiz 2023-cü il böyük və qüdrətli Türkiyənin qurulmasının müjdəsini verəcəyimiz yeni mərhələ olacaq. Bəli, beynəlxalq arenada mövqelərini əzmlə möhkəmləndirən, yeni-yeni sosial-iqtisadi layihələr əsasında bütün sahələr üzrə sürətlə inkişaf edən Türkiyə müdafiə qüdrətini və iqtisadi yüksəlişini dünyanın aparıcı dövlətləri ilə eyni sıraya çatdırmaqda qərarlıdır. Dövlət siyasətinin təməlində Milli təhlükəsizliyin qorunması, ölkənin müdafiə qüdrətinin yüksəlişi, xalqın rifahının təmin edilməsi və s. dövlət siyasətinin təməl prinsipləridir.

Tarixi mənbələrdən məlum olduğu kimi 1919-cu ildə Anadolunun işğalı türk xalqının yaddaşına dərin izlər buraxıb. Düşmən qüvvələrin donanması İstanbulu zəbt edib. Fransız ordusu Adanada, ingilislər Urfa, Maraş, Samsun və Merzifonda, italyanlar Antalya və Anadolunun cənub-qərbində yerləşiblər. Müttəfiq qüvvələrin razılığı ilə 1919-cu il mayın 15-də yunan qoşunlarının İzmirə çıxması vəziyyəti daha da ağırlaşdırıb. Lakin hər zaman tarixin ağır sınaqlarından alnıaçıq çıxan türk xalqı bu dəfə də nikbinliyini itirməyib. Xalqın mübarizə əzmi düşmənlərə göz dağı olub.

Beləliklə, qazi Mustafa Kamal Paşanın komandanlığı ilə yenidən milli-azadlıq mübarizəsinə qalxan mətanətli türk xalqı 1921-ci ildə Sakaryanı qəhrəmanlıqla qoruyub. Sakaryada 22 gün gecə-gündüz döyüşən türklər avqustun 23-də düşmənin irəliləməsinin qarşısını alaraq ona sarsıdıcı zərbələr vurublar. Sentyabrın 13-dək davam edən bu milli şərəf savaşında türk ordusu bir qarış da olsa geri çəkilməyib, düşmənin hücumlarının qarşısını igidliklə alıb. Cəsur türk zabitləri bir an olsa belə səngərlərdən uzaqlaşmadan dünya hərb tarixinə qızıl hərflərlə qəhrəmanlıq dastanları yaradıblar.

Anadolunun düşməndən azad olunması uğrunda gedən növbəti savaşların başlanması da avqusta təsadüf edib. 1922-ci avqustun 26-da Mustafa Kamal Atatürkün komandanlığı ilə bütün cəbhə boyu hücuma keçmək əmri alan türk ordusu düşməni hər tərəfdən sıxışdırıb. Avqustun 30-da Kütahyanın işğaldan azad edilməsi düşməni vəlvələyə salıb. Düşmən bütün istiqamətlərdə geri çəkilməyə məcbur olub. Bu döyüşlər türk xalqının şanlı azadlıq tarixinin dönüş nöqtəsinə çevrilib.

İşğalçılara qarşı böyük hücumun başlandığı 30 avqust tarixini böyük təntənə ilə qeyd edən Türkiyə Silahlı Qüvvələri hazırda dünyanın ən qabaqcıl Orduları sırasında yer alır. Azərbaycan dövlət müstəqilliyini bərpa edəndən sonra bütün istiqamətlərdə olduğu kimi hərbi sahədə də Azərbaycana kompleks yardım göstərən qardaş Türkiyənin Milli Ordumuzun qurulmasına və inkişafında böyük səylər göstərib. Məhz bu əməkdaşlığın nəticəsidir ki, Müzəffər Ali Baş Komandan İlham Əliyevin rəhbərliyi ilə qəhrəman Azərbaycan Ordusu 44 günlük Vətən müharibəsində parlaq Qələbə qazanaraq 30 illik işğala son qoyub. Rəşadətli Azərbaycan Ordusu peşəkar şücaət göstərərək Azərbaycanın ərazi bütövlüyünü təmin edib.

Ümummilli lider Heydər Əliyevin “Bir millət, iki dövlət!” şüarı ilə dinamik inkişaf edən Azərbaycan-Türkiyə qardaşlığı nəsillərə örnək, işıqlı gələcəyimizin nur yoludur. Bu şüar müttəfiqliyimizin fəlsəfəsi, birgə inkişafımızın gerçəklik tələbidir. Qazi Mustafa Kamal Atatürkün söylədiyi “Azərbaycanın sevinci sevincimiz, kədəri, kədərimizdir!”,- ifadəsinin məntiqi anlamı ilə hər bir Azərbaycanlı qardaş Türkiyəyə ancaq və ancaq sevincli günlər arzulayır, tarixi sevincini iftixarla bölüşür. Bəli, Türkiyənin hər bir uğurunu öz sevinci kimi qarşılayan Azərbaycan xalqı 30 avqust - Zəfər bayramı və Silahlı Qüvvələr Gününü də böyük qardaş məhəbbəti ilə qəbul edir. Qəhrəman türk xalqı, rəşadətli türk Ordusu bayramınız mübarək!

Sabir Şahtaxtı

AZƏRTAC-ın xüsusi müxbiri

Ankara