Türkiyəli ekspert: Ankara BRICS platformasından uzaqlaşmamalıdır
Ankara, 25 sentyabr, AZƏRTAC
Türkiyə dünyanın fəal inkişaf edən iqtisadiyyatlarını birləşdirən BRICS platformasından uzaqlaşmamalıdır.
AZƏRTAC xəbər verir ki, bu fikri Türkiyənin Uludağ Universitetinin dosenti Yüksel Okşak bildirib.
Onun sözlərinə görə, BRICS-in hələ Avropa İttifaqı kimi inkişaf etmiş institusional bazası olmasa da, bu platforma ilə fəal dialoq Türkiyə üçün vacibdir və Ankara orada iştirakın müsbət və mənfi tərəflərini təhlil etməlidir.
“Biz bu təşkilata üzv olmaqla həm iqtisadi, həm də siyasi baxımdan nə əldə edəcəyimiz sualına aydın cavab almalıyıq”, - deyə o qeyd edib.
Okşak Türkiyənin BRICS ölkələri ilə ticarətində ciddi balanssızlığa diqqət çəkib. Belə ki, Türkiyə Rusiya və Çindən bu ölkələrə tədarük etdiyindən qat-qat çox idxal edir. Hindistan və digər ölkələrlə də vəziyyət eynidir. Türkiyənin bu qrup ölkələrlə xarici ticarət kəsiri 90 milyard dollara çatır.
Ekspert izah edib ki, türk ixracatçılarının BRICS bazarlarına gedən yolda bu gün ciddi gömrük məhdudiyyətlər durur və bu, türk şirkətlərinin rəqabət imkanlarını azaldır. “Bu baxımdan Ankaranın BRICS sıralarına qoşulmaq istəyi tamamilə təbiidir. Əgər bu təşkilata qoşulmaq Türkiyənin xarici ticarət kəsirini ən azı 30 milyard dollar azaltmağa imkan verərsə, Qərbin mənfi reaksiyasına baxmayaraq, artıq BRICS-ə inteqrasiya planını müzakirə etməyə dəyər”, - deyə o vurğulayıb.
Türkiyə universitetinin dosenti xatırladıb ki, İkinci Dünya müharibəsindən sonrakı dövrdə Ankaranın Qərb ölkələri ilə münasibətləri iqtisadi deyil, siyasi prioritetlər nəzərə alınmaqla qurulurdu. “Keçən əsrin ortalarında Türkiyə dialoqun müdafiə konsepsiyasını vacib hesab edərək, əvvəlcə Aİ və NATO ideyalarına məhz bu prizmadan yanaşdı. Bu arada, BRICS-in qavrayışı, əksinə, iqtisadi dividentlərə əsaslanır”, - deyə ekspert bildirib.
O qeyd edib ki, BRICS platformasının cəlbediciliyi Avropa İttifaqından nümunə götürərək ümumi bazar və vahid valyuta ideyasının müzakirə edilməsinin başlanması ilə artacaq.
“Türkiyə təşkilatlarda iştirak məsələsini sırf öz milli maraqları mövqeyindən qəbul etməlidir. Fikrimcə, BRICS-ə qoşulmaq Ankaraya zərər deyil, fayda gətirəcək. Qərb şübhəsiz ki, Türkiyə üçün mühüm tərəfdaş və bazardır, lakin alternativ platformalarla dialoqdan imtina etmək üçün heç bir səbəb olmamalıdır. Ankara öz kursu ilə getməlidir”, - deyə türkiyəli ekspert əminliyini bildirir.
Okşak Türkiyənin həm siyasi, həm də iqtisadi məsələlərə balanslı yanaşmasının vacibliyini vurğulayıb. “Türkiyənin səmərəli və balanslı siyasətinin son nümunəsi Ukraynadakı müharibəyə münasibəti oldu. Ankara Rusiya ilə əməkdaşlıqdan imtina etmədi və nəticədə taxıl böhranı da daxil olmaqla bir sıra problemlərin həllinə öz töhfəsini verə bildi”, - deyə Türkiyə universitetinin dosent əlavə edib.
Ramin Abdullayev
AZƏRTAC-ın xüsusi müxbiri
Ankara
Bölmənin digər xəbərləri
