İQTİSADİYYAT
TÜRKİYƏNİN BAŞ NAZİRİ RƏCƏB TAYYİB ƏRDOĞAN ARDNŞ-İN PREZİDENTİ İLƏ GÖRÜŞMÜŞDÜR
AZƏRTAC-ın xüsusi müxbiri xəbər verir ki, Türkiyənin Baş naziri Rəcəb Tayyib Ərdoğan Ankarada səfərdə olan Azərbaycan Dövlət Neft Şirkətinin (ARDNŞ) prezidenti Rövnəq Abdullayevlə görüşmüşdür.
Rövnəq Abdullayev müxbirimizə bildirmişdir ki, Türkiyə hökumətinin başçısı ilə görüşdə ölkələrimiz arasında enerji sahəsində əməkdaşlığın perspektivləri müzakirə olunmuşdur. Ulu öndər Heydər Əliyevin neft strategiyasının uğurla həyata keçirilməsi nəticəsində ölkəmiz böyük neft və qaz ixracatçısına çevrilmişdir. ARDNŞ Türkiyədə də böyük enerji layihələri həyata keçirmək əzmindədir. Rəcəb Tayyib Ərdoğan özünün və Türkiyə dövlətinin bu layihələri dəstəklədiyini və bu dəstəyin gələcəkdə də davam edəcəyini bildirmişdir.
ARDNŞ-in prezidenti əlavə etmişdir ki, şirkət Azərbaycan Prezidenti İlham Əliyevin tapşırığı ilə böyük investisiya siyasəti həyata keçirir və hazırda beynəlxalq neft şirkətlərindən birinə çevrilmişdir. Türkiyədə, Gürcüstanda və Rumıniyada irimiqyaslı layihələr həyata keçirilir. Dövlətimizin başçısının emal müəssisələrimizin dənizlərə yaxınlaşdırılması siyasətinə müvafiq olaraq, Türkiyənin Ceyhan limanında böyük emal zavodunun tikilməsi ilə əlaqədar işlər davam edir. ARDNŞ müvafiq lisenziya almışdır. Hazırda zavodun inşa ediləcəyi torpaq sahəsinin alınması prosesinə başlanmışdır. Ümummilli liderimiz Heydər Əliyevin neft strategiyasının şah damarı olan Bakı-Tbilisi-Ceyhan boru kəməri uğurla fəaliyyət göstərir. Bu boru xətti ilə artıq 28 milyon ton xam neft ixrac olunmuş, 250-ci tanker Azərbaycan nefti ilə yüklənərək yola salınmışdır. Gələcəkdə bu neftin Ceyhan limanında emal edilərək Aralıq dənizi ölkələrinə, o cümlədən Türkiyəyə hazır məhsul kimi satılması ölkəmizə böyük mənfəət gətirəcəkdir.
Rövnəq Abdullayev bildirmişdir ki, hazırda hər gün Türkiyəyə 8 milyon 200 min kubmetr “Şahdəniz” qazı verilir. Yaxın zamanlarda isə müqavilənin şərtlərinə görə, biz qardaş ölkəyə ildə 6 milyard kubmetr qaz nəql etməyi planlaşdırırıq. Rəcəb Tayyib Ərdoğanla görüşdə “Şahdəniz” yatağının ikinci fazasından hasil olunacaq təbii qazın Avropaya nəql olunması məsələsi də müzakirə olunmuşdur. ARDNŞ-in prezidenti bütün digər layihələr kimi bu layihənin də uğurla həyata keçiriləcəyinə əmin olduğunu bildirmişdir.