Yanvarın 28-də Almatıda TÜRKSOY-un 17-ci toplantısı işə başlamışdır. Türkdilli dövlətlərin mədəniyyət nazirləri və nümayəndə heyətləri əvvəlcə Dövlət İncəsənət Muzeyində TÜRKSOY-un rəsm sərgisinin açılışında iştirak etmişlər. Sərgidə gənc Azərbaycan rəssamı Rəşad Mehdiyevin işləri də maraqla qarşılanmışdır. 

Sərgini giriş sözü ilə Qazaxıstanın mədəniyyət, informasiya və ictimai həmrəylik naziri Muxtar Kul- Məhəmməd açmışdır. TÜRKSOY-un baş direktoru, Azərbaycanın mədəniyyət naziri Polad Bülbüloğlu çıxış edərək, türkdilli dövlətlərin gənc rəssamları üçün təşkil olunmuş Beynəlxalq Yaradıcılıq Laboratoriyasının uğurlarından danışmışdır. O demişdir ki, toplantı zamanı nazirlər bu rəsmlərin arasından ən yaxşısını seçəcək, həmin əsərin müəllifinə TÜRKSOY-un xüstusi mükafatı təqdim olunacaqdır.

Sonra TÜRKSOY-un toplantısı öz işini davam etdirmişdir. Türkdilli dövlətlərin mədəniyyət nazirləri yarandığı 1992-ci ildən bəri TÜRKSOY-un nailiyyətlərindən, türkdilli dövlətlərin mədəniyyətlərinin bir-birinə yaxınlaşması, ümumtürk mədəniyyətinin dünyada təbliği sahəsindəki rolunddan danışmışlar. Qeyd olunmuşdur ki, ayrı-ayrı dövlətlərin milli-mədəni tarixində xüsusi yer tutan və YUNESKO meyarlarına uyğun olan tarixi günlərin, yubileylərin TÜRKSOY tərəfindən yüksək səviyyədə keçirilməsi, qarşılıqlı mədəni mübadilələr, yaradıcılıq müsabiqələri və festivalları, qastrollar, mədəniyyət günlərinin və müxtəlif mövvzulu sərgilərin təşkili türkdilli dövlətlərin mədəni həyatına bir dirçəliş gətirmişdir.

TÜRKSOY-un baş direktoru Polad Bülbüloğlu geniş məruzə ilə çıxış etmiş, bu təşkilata daxil olan ölkələrin dövlət başçılarının, xüsusən Prezidentlər Heydər Əliyevin və Nursultan Nazarbayevin TÜRKSOY-un fəaliyyətinə göstərdikləri köməyi vurğulamışdır.

TÜRKSOY-un 17-ci toplantısı yanvarın 31-də başa çatacaqdır.