ÜÇTƏRƏFLİ GÖRÜŞ
AZƏRTAC-ın xüsusi müxbirləri xəbər verirlər ki, fevralın 7-də Gürcüstan Parlamentinin binasında Azərbaycan Respublikasının Prezidenti İlham Əliyevin, Gürcüstan Prezidenti Mixail Saakaşvilinin və Türkiyə Respublikasının Baş naziri Rəcəb Tayyib Ərdoğanın üçtərəfli görüşü olmuşdur.
Prezident Mixail Saakaşvili bu görüşün və Bakı-Tbilisi-Qars dəmir yolu layihəsinin əhəmiyyətini vurğuladı, onun regional əməkdaşlığın inkişafına xidmət edəcəyini söylədi.
Prezident İlham Əliyev Bakı-Tbilisi-Qars dəmir yolu layihəsinin zəruriliyindən danışaraq dedi ki, bu, bizi daha sıx birləşdirəcək, regional əməkdaşlığı daha da genişləndirəcəkdir. Bu layihənin həyata keçirilməsi həm də regiona sabitlik, sülh gətirəcək və ümumiyyətlə ölkələrimizin, xalqlarımızın iqtisadi maraqlarına cavab verir. Bakı-Tbilisi-Ceyhan və Bakı-Tbilisi-Ərzurum neft, qaz kəmərlərinin iqtisadi əhəmiyyətindən danışan dövlətimizin başçısı bildirdi ki, Bakı-Tbilisi-Ərzurum qaz kəmərinin işə düşməsi əlaqələrimizi daha da möhkəmləndirəcəkdir. Üç ölkə arasında enerji sahəsində əməkdaşlıq var, lakin qeyri-neft sektorunda da əlaqələrin genişlənməsi vacibdir və hazırda bu istiqamətlərdə konkret işlər görülür. Prezident İlham Əliyev 2007-ci ildə Azərbaycanın neft və qaz hasilat və ixracını genişləndirəcəyini bildirdi və dedi ki, bu gün görülən işlər, ölkələrimiz və xalqlarımız arasında, eləcə də regional əməkdaşlığın daha da genişləndirilməsi və möhkəmləndirilməsinə xidmət edir.
Türkiyənin Baş naziri Rəcəb Tayyib Ərdoğan Bakı-Tbilisi-Qars dəmir yolu layihəsindən danışarkən onu Dəmir İpək yolu adlandırdı. O, Bakı-Tbilisi-Ceyhan və Bakı-Tbilisi-Ərzurum neft-qaz kəmərləri də daxil olmaqla, üç böyük layihənin regionda sabitliyə və iqtisadi inkişafa böyük töhfə verdiyini dedi və xalqlarımızın firavanlığı üçün əhəmiyyətini vurğuladı. Baş nazir dedi ki, Asiya ilə Avropanı birləşdirəcək dəmir yolu layihəsi regional əməkdaşlığa daha bir nümunədir.
Bölmənin digər xəbərləri
