Bakı, 1 sentyabr, AZƏRTAC

“YAŞAT” Fondunun və “ASAN Könüllüləri” Təşkilatının birgə təşkilatçılığı, “PMD Hospitality”nin tərəfdaşlığı ilə həyata keçirilən və Ulu Öndər Heydər Əliyevin 100 illik yubileyinə həsr olunan 3-cü “YAŞAT” düşərgəsi başa çatıb.

Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin İctimaiyyətlə əlaqələr şöbəsindən AZƏRTAC-a verilən məlumata görə, düşərgənin sonuncu günündə psixoloqlarla görüşlər, hoteldaxili əyləncə saatı reallaşdırılıb.

Bağlanış mərasimində “YAŞAT” Fondunun rəhbəri, Qarabağ qazisi Elvin Hüseynov uşaqlarla görüşüb. İştirakçılara və düşərgənin təşkilinə dəstək göstərən könüllülərə sertifikatlar və müxtəlif hədiyyələr təqdim edilib.

Günün sonunda tanınmış mədəniyyət və incəsənət xadimlərinin iştirakı ilə konsert proqramı təqdim olunub.

Bununla da 3-cü “YAŞAT” düşərgəsinə yekun vurulub.

Ümumilikdə, 300-dən çox şəhid övladını əhatə edən 7 düşərgə həyata keçirilib. Layihə çərçivəsində hər düşərgədə uşaqlar üçün əyləncə saatları, öyrədici təlimlər, teatr tamaşaları, öz sahəsində müsbət imicə malik olan peşəkarlarla, qurum rəhbərləri ilə görüşlər, ekskursiyalar, habelə psixoloqların iştirakı ilə təlimlər, konsultasiyalar və müğənnilərin iştirakı ilə konsert proqramları keçirilib.

“Shamakhi Palace Sharadil” otelində keçirilən hər bir düşərgə 5 gecə 6 günü əhatə edib.

Qeyd edək ki, sentyabr ayının əvvəlinədək reallaşdırılan düşərgələrdə şəhidlərimizin 10-11, 12-14 , 15-17 yaş kateqoriyasında olan övladları iştirak ediblər.

Düşərgə boyunca uşaqlar sığortalanmış olublar və davamlı olaraq həkim nəzarəti, psixoloqlar tərəfindən müşayiət olunublar. Psixoloqlar tərəfindən terapiyalar, o cümlədən fərdi və kollektiv görüşlər keçirilib.

Hər düşərgədə sponsorlar və dəstəkçilər tərəfindən iştirakçılara müxtəlif hədiyyələr təqdim edilib.

Düşərgənin tərəfdaşları “PMD Hospitality’’ şirkəti, “Shamakhi Palace Sharadil” oteli, baş sponsoru Bakcell, sponsorları “Nar”, “PAŞA Bank” ASC, “BRAVO” supermarketlər şəbəkəsi, dəstəkçiləri “İnnovasiyalar Mərkəzi”, “Azərbaycan Hava Yolları” QSC, “PAŞA Həyat Sığorta” ASC, “Gənc Psixoloqlar” İctimai Birliyi, “Digital Umbrella” şirkəti, Şamaxı Safari Park, “DeFacto” mağazalar şəbəkəsi, “Panda Kids” mağazalar şəbəkəsi, “Elm Galaxy'” MMC, “Libraff’’ kitab mağazaları şəbəkəsi, “Happy Day Cake”, “Booo.az”, “Milla”, “Gədəbəy Mineral Suları” MMC, “Bilim Bakı” mərkəzi, “INNOLAND” İnkubasiya və Akselerasiya Mərkəzi, Şamaxı Astrofizika Rəsədxanası; “AL Market” mağazalar şəbəkəsi, “Şokki Mokki” markası, media dəstəkçiləri: Azərbaycan Televiziyası (AzTV), İctimai Televiziya (İTV), ASAN Radiodur.