Ukrayna Macarıstana etirazını bildirib
Kiyev, 5 sentyabr, AZƏRTAC
Ukrayna Macarıstana rəsmi etirazını bildirib.
AZƏRTAC Ukrayna Xarici İşlər Nazirliyinin mətbuat xidmətinə istinadla xəbər verir ki, Macarıstanın Ukraynadakı müvəqqəti işlər vəkili Kristina Marfi XİN-ə dəvət olunub və ona rəsmi Kiyevin etiraz notası təqdim edilib. Etiraza səbəb Macarıstanın Baş Naziri Aparatının dövlət katibi Tristana Azbeyin açıqlaması olub.
Nazirliyin məlumatında qeyd edilir ki, Azbey Ukraynadakı "vətəndaş müharibəsi böhranı" ilə əlaqədar qəbuledilməz ritorikadan istifadə edib. Belə bir bəyanat nəinki həqiqətə uyğun deyil, eyni zamanda, Macarıstan da daxil olmaqla Avropa İttifaqına və NATO-ya üzv dövlətlərin rəsmi mövqeyinə ziddir.
Məlumatda bildirilir ki, rəsmi Kiyev Macarıstanın Ukraynanın ərazi bütövlüyünü və suverenliyini dəstəkləməkdə daha da həmrəylik nümayiş etdirəcəyini gözləyir və ümid edir.
Emil Hüseynli
AZƏRTAC-ın xüsusi müxbiri
Kiyev
Bölmənin digər xəbərləri
