CƏMİYYƏT
Ümummilli Liderin yaratdığı Cəmşid Naxçıvanski adına lisey bu gün peşəkar zabitlərin yetişdirilməsində böyük rol oynayır
Bakı, 10 may, AZƏRTAC
Cəmşid Naxçıvanski adına Hərbi Liseyə mediatur təşkil olunub.
AZƏRTAC xəbər verir ki, mediatur zamanı Hərbi Lisey haqqında KİV nümayəndələrinə geniş məlumat verilib.
Bildirilib ki, Cəmşid Naxçıvanski adına hərbi məktəbin yaradılması bu il ölkəmizdə anadan olmasının 100 illiyi təntənəli şəkildə qeyd edilən Ulu Öndər Heydər Əliyevin adı ilə bağlıdır. Məktəb Azərbaycanda hərbi peşənin nüfuzunun yüksəlməsinə və gənclərdə bu peşəyə marağın artmasında mühüm rol oynayır. Ulu Öndər öz övladı qədər sevdiyi liseyə diqqət və qayğı göstərər, mütəmadi olaraq burada oxuyan kursantlarla görüşər, onların qayğıları ilə maraqlanar, təhsildə qazandıqları uğurlarla fəxr edərdi.
Hərbi təmayüllü məktəbə diviziya komandiri general Cəmşid Naxçıvanskinin adının verilməsi də təsadüfi deyil. Bu da milli-mənəvi dəyərlərə hörmət əlaməti kimi qiymətləndirilməlidir. Respublika rəhbərliyinin qayğısı ilə 1976-cı, 1978-ci və 1981-ci illərdə məktəbin maddi-texniki bazasının genişləndirilməsi və möhkəmləndirilməsi istiqamətində mühüm qərarlar qəbul edilib və həyata keçirilib.
Müzəffər Ali Baş Komandanın rəhbərliyi ilə Vətən müharibəsində əldə etdiyimiz Qələbədə əhəmiyyətli rolu olan hərbi liderlərin-komandirlərin böyük əksəriyyəti hərbi həyatda ilk addımlarını məhz təməli Ulu Öndər Heydər Əliyev tərəfindən qoyulan Cəmşid Naxçıvanski adına Hərbi Liseydə atıb. Hərbi Liseyin yetirmələri müstəqil Azərbaycan Silahlı Qüvvələrinin formalaşdırılması və möhkəmləndirilməsinə dəyərli töhfələr verib, ölkəmizin ərazi bütövlüyünün bərpası uğrunda aparılan hərbi əməliyyatlarda həmişə ön cəbhədə yer alıblar. Böyük rəşadət nümayiş etdirən liseyin məzunlarından 19 nəfər "Vətən Müharibəsi Qəhrəmanı", 11 nəfər "Azərbaycanın Milli Qəhrəmanı" fəxri adlarına layiq görülüb, yüzlərlə hərbi qulluqçu müxtəlif orden və medallarla təltif olunub. Müzəffər Ali Baş Komandanın rəhbərliyi ilə aparılan 44 günlük Vətən müharibəsi dövründə liseyi bitirmiş zabitlər hərb tariximizə şanlı səhifələr yazıblar.
KİV nümayəndələri media tur çərçivəsində hərbi liseyin tədris korpusu ilə tanış olublar. Jurnalistlərə tədris korpusunun elektron tədris kursu haqqında məlumat verilib. Burada birinci kurs tələbələri olan kursantlara hərbi sahə üçün zəruri olan kompüter bilikləri və bacarıqları öyrədilir.
Ümummilli Lider Heydər Əliyevin yaratdığı Cəmşid Naxçıvanski adına lisey peşəkar zabitlərin yetişdirilməsi sahəsində çox böyük rol oynayır. Liseyin məzunu, Aprel əməliyyatları, Vətən müharibəsində Cəbrayıl, Qubadlı və Laçın istiqamətlərində gedən döyüşlərdə fərqlənmiş kapitan Fuad Məmmədov AZƏRTAC-a müsahibəsində deyib ki, hazırda bu məktəbin yüzlərlə məzunu milli ordumuzda mühüm vəzifələr tuturlar. İşğalçı Ermənistanla döyüşlərdə, 44 günlük Vətən müharibəsində şücaət göstərənlər arasında bu məktəbin yetirmələri olan peşəkar zabitlərimiz xüsusilə fərqləniblər: “Bir neçə ildir Azərbaycan Ordusunda xidmət edirəm. Bu məktəb haqqında təəssüratlarım çox yüksəkdir. Burada verilən hərbi bilik və təlimlər, o cümlədən digər bilik bacarıqların artırılması yüksək səviyyədə təşkil edilib. Hazırda hərbi liseydə təhsil alan kursantları ordumuzun peşəkar zabitləri sırasında görəcəyik. Bu da Ümummilli Lider Heydər Əliyevin böyük uzaqgörən siyasəti və zəhməti nəticəsində mümkün olub. Onun yaratdığı hərbi məktəb Azərbaycan tarixinin ən parlaq səhifələrindən biridir.
Cəmşid Naxçıvanski adına liseyin məzunu, kapitan Rail Qənbərli bildirib ki, Ulu Öndər Heydər Əliyevin Azərbaycanda hakimiyyəti illərində ölkəmizin təkamülü, gələcək inkişafını təmin edən milli müdafiə strategiyasının təməli qoyulub. O qeyd edib ki, keçmiş Sovetlər İttifaqının tərkibində olduğumuz zamanda totalitar rejimin hökm sürdüyü dövrdə Cəmşid Naxçıvanskinin adını daşıyan məktəbin yaradılması ilə bağlı təşəbbüslə çıxış etmək böyük cəsarət tələb edirdi. Belə addımın atılması Azərbaycanın gələcəkdə müstəqil ordusunun olması istəyindən irəli gəlib. Cəmşid Naxçıvanskinin adına liseyi haqlı olaraq “Heydər Əliyev məktəbi” adlandırırlar.
Məktəbə 2008-ci ildə daxil olduğunu deyən müsahibimiz Vətənə, dövlətə sevgini hərbi məktəbdə aşıladıqlarını, burada təhsil alan kadrların zabit kimi püxtələşməsində, vətənpərvər insan kimi böyüməsində liseyin xüsusi rolu olduğunu vurğulayıb.