UŞAQLARIN SAĞLAMLIĞI NAMİNƏ
İkitərəfli nəcib əməkdaşlığın nəticələri artıq bu gün özünü göstərir. ARUT-un Kiyev nümayəndəliyinin başçısı Rasim Tağıyev bildirmişdir ki, Ukrayna Tibb Elmləri Akademiyası Cərrahlıq və Orqanların Köçürülməsi İnstitutunun aparıcı kardiocərrahı Boris Tudorovun 7 yaşlı Orxan Bayramovun ürəyində apardığı uğurlu əməliyyat bu əməkdaşlığın ilk bəhrəsidir. Əməliyyatın xərcinin 50 faizini Ukrayna Fondu ödəmişdir.
Qeyd edək ki, Orxanın yol və əməliyyat xərclərinin ödənilməsinə bilavasitə Prezident İlham Əliyev kömək etmişdir. Dövlətimizin başçısı Azərbaycanda müalicəsi mümkün olmayan xəstə uşaqların xilası üçün bundan sonra da bütün işləri görməyi tapşırmışdır.
İyunda Kiyevdə daha dörd azərbaycanlı uşağın ürəyində cərrahiyyə əməliyyatı aparılacaqdır. Azərbaycan Prezidenti bu əməliyyatların da xərclərini öz üzərinə götürmüşdür.
Bundan əlavə, 60 azərbaycanlı uşaq yay tətilini Ukraynanın ən yaxşı sanatoriyalarında – Truskavetsdə və Krımda keçirəcək, burada müalicə olunacaqdır. Bütün xərcləri Ukrayna tərəfi ödəyəcəkdir. Hazırda serebral iflic xəstəliyinə tutulmuş uşaqların Ukraynanın ixtisaslaşmış bərpa mərkəzlərində müalicəsi və reabilitasiyası və mürəkkəb göz əməliyyatlarının aparılması ilə bağlı məsələlər razılaşdırılır.
