VAHİMƏLİ “KAZAK”
Kiyev, 18 mart (AZƏRTAC). Ukrayna KİV-ləri bu ölkənin Silahlı Qüvvələrinin Baş Qərargahına istinadla xəbər verir ki, Ukraynada ən yeni “Kazak” zirehli transportyoru yaradılmışdır.
Avqustun 24-də Ukraynanın Müstəqillik günü münasibətilə keçiriləcək paradda xüsusi əməliyyat qüvvələri üçün nəzərdə tutulmuş bu ən yeni döyüş maşını nümayiş etdiriləcəkdir.
Ekspertlərin rəyinə görə, “Kazak” döyüş maşını dünyadakı analoqlarından geri qalmır və ondan xüsusi əməliyyatlar, habelə sülhyaratma missiyaları zamanı səmərəli istifadə oluna bilər.
Çəkisi 5,5 ton olan zirehli transportyor 176 litr gücündə mühərriklə təchiz olunmuşdur, saatda 120 kilometr sürətlə hərəkət edir. Maşın trotil ekvivalenti ilə 3 kiloqramdan artıq çəkisi olan minanın partlayışına davam gətirir və 5 nəfərlik heyətə xəsarət toxunmur.
“Kazak” GPS-naviqatoru, radiasiya və kimyəvi kəşfiyyat cihazları, arxa görünüş kamerası, kondisioner, ABS sistemi, yüksək səs və termoizolə ilə təchiz olunmuşdur. Bronetransportyorun iki pulemyotu və avtomatik qranatomyotu vardır.
Paradda digər tanklar və silahlarla yanaşı, “Oplot” tankı, “Ladya” BTR-4 və yüngül zirehli “Dozor-B” də nümayiş etdiriləcəkdir.
Zeynal Ağazadə
AZƏRTAC-ın xüsusi müxbiri
Kiyev
######
 |
 |
Bölmənin digər xəbərləri
