SİYASƏT
Valentina Meyeroviç: Yan Azərbaycanı çox sevirdi və Azərbaycan xalqına həmişə böyük hörmət bəsləyirdi
Bakı, 23 yanvar (AZƏRTAC). Xəbər verildiyi kimi, İsrail-Azərbaycan Beynəlxalq Assosiasiyası (“Azİz”) əslən Azərbaycandan olan İsrail sakinlərinin öz mənşə ölkəsinin tarixi ilə tanışlığını davam etdirərək Heydər Əliyev Fondunun dəstəyi ilə Xayfa universitetində İranın və İran körfəzi ölkələrinin öyrənilməsi üzrə “Ezra” mərkəzi ilə birlikdə 1990-cı il 20 Yanvar qanlı faciəsini anma gecəsi keçirmişdir.
Yanvar faciəsi zamanı həlak olmuş Yan Meyeroviçin həyat yoldaşı Valentina “Azİz” Assosiasiyasının mətbuat xidmətinə verdiyi müsahibədə qeyd etmişdir ki, 20 Yanvar onun həyatında ən ağır və unudulmaz gündür.
Valentina Meyeroviç demişdir: “O dəhşətli gündə mən ərimi itirdim. Biz çox xoşbəxt idik. Bizi tanıyanların çoxu deyirdi ki, biz dünyada ən xoşbəxt adamlarıq. Buna görə 20 Yanvar mənim üçün çox ağır və kədərli gündür. Həmin gün mən tək qalmağı, öz dərdimi başqaları ilə bölüşməməyi üstün tuturam. Artıq neçə il keçib və aydındır ki, heç kəs bu hadisələri unutmur, mən isə tək qalmaq istəyirəm”.
Valentina Meyeroviç ərinin gənc yaşında dünyasını dəyişməsinə görə çox kədərləndiyini bildirmişdir. O demişdir: “Uşaqlarım onu çətinliklə xatırlayırlar. Oğlumun o vaxt cəmi bir yaşı vardı, atasını xatırlamır. Çox təəssüf ki, Yan övladlarımızın necə böyüdüyünü, necə uğurlu və xoşbəxt olduqlarını görmür. İndi Yanın üç nəvəsi var, bu yaxınlarda oğlumuz da evlənib”.
Meyeroviç Bakı haqqında böyük məhəbbətlə və ürək ağrısı ilə danışır. 1990-cı ilin qara yanvar hadisələri zamanı həlak olmuş Yan Meyeroviçin dul qadını müsahibəsinin sonunda demişdir: “10 ildən çoxdur ki, İsraildə yaşayıram. Bakını tez-tez xatırlayıram. Qürurla deyə bilərəm ki, mən Bakını, Azərbaycanı çox sevirəm. Təəssüflənirəm ki, tale belə gətirdi... Ərim Yan Azərbaycanı hədsiz sevirdi, Azərbaycan dilində çox gözəl danışırdı və Azərbaycan xalqına həmişə böyük məhəbbətlə yanaşırdı. Tanrıdan arzum budur ki, Azərbaycan xalqı bir də heç vaxt bu cür faciələrlə üzləşməsin. Mən bütün cavan ailələrə 120 yaşa qədər bir yerdə olmalarını arzulayıram. Tək qalmağın necə çətin olduğunu bilirəm. Balaca nəvəm tez-tez gözləyir ki, babası Yan gələcəkdir. Bu gün biz ailəliklə Azərbaycan televiziyasına baxdıq və Azərbaycan xalqının kədərinə şərik olduq, həmişə də bu kədərə şərik olacağıq”.