VƏKİLLƏR HAKİMİN QƏRARINDAN NARAZIDIRLAR
AZƏRTAC-ın xüsusi müxbiri xəbər verir ki, Gürcüstanin sabiq prezidenti Eduard Şevardnadzeyə sui-qəsddə şübhəli bilinən və hazırda axtarışda olan keçmiş təhlükəsizlik naziri İqor Georqadzenin 12 nəfər tərəfdaşının məhkəmə prosesi başlanmışdır. Bu şəxslər həm də dövlət çevrilişi etmək məqsədi ilə sui-qəsd hazırlamaqda ittiham olunurlar.
Tbilisi məhkəməsinin hakimi Mamuka Nozadze prokurorluğun müraciəti əsasında prosesin qapalı keçirilməsinə qərar vermişdir. Bu, müttəhimlərin vəkilləri ilə yanaşı, ictimaiyyət nümayəndələrinin, eyni zamanda prosesdə iştirak edən amerikalı vəkil Robert Foqelneystin də narazılığına səbəb olmuşdur. Amerikalı vəkil demişdir: “Bu, çox həyəcanlandırıcı faktdır. Müttəhimlər onların başına gətirilənlərin açıqlanmasını istəyirlər. Onların bu işi diqqətlə izlənilir. Bu faktları başqalarına bildirməmək üçün prokurorluğun öz məqsəd və səbəbləri vardır. Hakimin ictimaiyyətin real faktlardan xəbər tutmağa imkan verməmək barədə qərarı təəccüb doğurur. Bu barədə mənim şəxsi fikrim vardır. Zənnimcə, bu işlə əlaqədar yaranmış vəziyyəti nəzərə almaqla, onlar ictimaiyyətin aləmə səs salacaq faktlardan xəbər tutmasını istəmirlər”.
Bölmənin digər xəbərləri
