Vətənin çağırışına hazırıq
Bakı, 10 fevral, Məhərrəm Əlioğlu, AZƏRTAC
Fevralın 10-da Müdafiə Nazirliyinin və Azərbaycan Dövlət İqtisad Universitetinin (ADİU) birgə təşkilatçılığı ilə “Vətənin çağırışına hazırıq!” devizi altında vətənpərvərlik mövzusunda tədbir keçirilib.
AZƏRTAC xəbər verir ki, universitetdə keçirilən tədbirdə ADİU-nun professor-müəllim və tələbə heyəti ilə yanaşı, Müdafiə Nazirliyinin general, zabit və əsgərləri də iştirak ediblər.
Əvvəlcə ulu öndər Heydər Əliyevin və Azərbaycanın müstəqilliyi, ərazi bütövlüyü uğrunda canlarından keçmiş şəhidlərimizin xatirəsi yad edilib.
Universitetin rektoru professor Ədalət Muradov çıxış edərək vətənpərvərlik mövzusunda belə tədbirlərin vacibliyini vurğulayıb. Rektor qeyd edib ki, dövlət müstəqilliyimizin, milli təhlükəsizliyimizin, xalqın əmin-amanlıq içərisində yaşamasının təminatçısı olan ordumuz son illərdə daha da möhkəmlənib, qüdrətlənib, mütəşəkkil hərbi qüvvəyə çevrilib. Azərbaycan Silahlı Qüvvələri regionun ən güclü ordusudur və istənilən təcavüzün qarşısını almağa, hücum tapşırığını yerinə yetirməyə qadirdir. Bu gün Azərbaycan Prezidenti İlham Əliyevin fəaliyyətində ordu quruculuğu prioritetdir.
Silahlı Qüvvələrə, onun şəxsi heyətinə ölkə rəhbərliyi tərəfindən hərtərəfli diqqət və qayğının göstərildiyini vurğulayan Ə.Muradov deyib ki, ordumuzun maddi-texniki bazası hər gün möhkəmlənir, yeni-yeni döyüş texnikaları, silah-sursatlar alınır. Keçirilən irimiqyaslı təlimlər göstərir ki, Azərbaycan Ordusu quruda, dənizdə və havada, istənilən iqlim şəraitində qarşıya qoyulmuş vəzifələri yerinə yetirməyə hər an hazırdır.
Sonra rektor tədbirdə iştirak edən generallara, cəbhə bölgəsindən, ön səngərdən gəlmiş zabit və əsgərlərə üzünü tutaraq deyib: “Bütün xalqımız kimi, Azərbaycan Dövlət İqtisad Universitetinin professor-müəllim və tələbə heyəti də ordumuzu sevir, onun gücünə inanır. Ordumuzun gücü isə malik olduğu ən yeni texnikaların - təyyarələrin, gəmilərin, tankların, artilleriya qurğularının, hava hücumundan müdafiə komplekslərinin və s. çoxluğu, müasirliyi, səmərəliliyi ilə yanaşı, həm də şəxsi heyətin peşəkarlığında, vətənpərvərliyində, mənəvi-psixoloji, siyasi, fiziki hazırlığının yüksəkliyindədir. Ordumuzun gücü həm də xalq ilə onun monolit birliyində, hər bir döyüşçünün ruh yüksəkliyindədir. “Hər şey ordu üçün, hər şey qələbə üçün!” ifadəsi bu gün hər birimizin şüarı olmalıdır”.
Professor Ə.Muradov çıxışının sonunda ulu öndərimiz Heydər Əliyevin “Azərbaycan Respublikasının təhlükəsizliyini və müdafiəsini təmin etmək kimi müqəddəs vəzifəni yerinə yetirən Milli Ordu bütün xalqın övladıdır və onun formalaşmasına, inkişafına müntəzəm qayğı və diqqət göstərmək hər bir dövlət təşkilatının, yerli orqanların, özəl qurumların, hər bir Azərbaycan vətəndaşının borcudur” sözlərini xatırladıb.
Müdafiə Nazirliyinin zabiti polkovnik Abdulla Qurbani cəbhə bölgələrindəki hərbi hissələrdən, birbaşa ön səngərdən tədbirə qatılan, döyüşdə və mənəvi-psixoloji hazırlıqda fərqlənən əsgər və zabitləri təqdim edib.
Tədbir iştirakçıları son zamanlar düşmənin kəşfiyyat-təxribat qruplarının hücum cəhdlərinin qarşısının alınmasında, mövqelərimizi intensiv atəşə tutan Ermənistan silahlı qüvvələrinin susdurulmasında xüsusi rəşadət və şücaət göstərmiş İlkin Muradovu, Təhmasib Abdullayevi və başqalarını alqışlarla qarşılayıblar. Onlar cəbhə xatirələrini danışaraq ön səngərdəki əsgərlərimizin döyüş və vətənpərvərlik ruhunun yüksək olduğunu, hər an ayıq-sayıq olduqlarını diqqətə çatdırıblar.
Təhsil ocağının rektoru döyüşdə fərqlənən hərbi qulluqçuları qiymətli hədiyyələrlə mükafatlandırıb.
Qarabağ müharibəsinin iştirakçısı, general-leytenant Yaşar Aydəmirovun, Milli Məclisin deputatı, professor Xanhüseyn Kazımlının, polkovnik-leytenant Elmar Zeynalabdinovun çıxışları maraqla qarşılanıb.
Hacıqabul rayonunun Nəvahi kənd sakini Elvin Qasımov tədbirdə çıxış edərək qardaşı Vüqarın düşmən atəşini susdurarkən şəhid olduğunu bildirib. O, yaxın günlərdə müddətdən artıq həqiqi hərbi xidmət hərbi qulluqçusu kimi qardaşının xidmət etdiyi hərbi hissədə xidmətə başlayacağını diqqətə çatdırıb.
Silahlı Qüvvələrin mahnı və rəqs ansamblı vətənpərvərlik marşları, mahnı və rəqslərindən ibarət geniş konsert proqramı ilə çıxış edib. Xalq artistləri Mübariz Tağıyev və Zaur Rzayev yeni mahnılarını təqdim ediblər.
Sonra Azərbaycan Dövlət İqtisad Universitetin professor-müəllim və tələbə heyətinin Azərbaycan əsgərinə ünvanlanan təbriki oxunub.
Rektor Ədalət Muradov və Azərbaycanın Milli Qəhrəmanı, general-mayor Fəxrəddin Cəbrayılov möhtəşəm vətənpərvərlik tədbirinin təşkilində göstərdiyi köməyə görə müdafiə naziri, general-polkovnik Zakir Həsənova minnətdarlıqlarını bildiriblər.
Tədbirin sonunda cəbhə bölgəsindən gələn hərbi qulluqçular üçün universitetin rəhbərliyi tərəfindən təşkil olunmuş ziyafətdə vətənpərvərlik mövzusunda söhbət davam edib.
Bölmənin digər xəbərləri
