VİKTOR YUŞŞENKO XAÇ ATASINA QƏHMƏR ÇIXIR
AZƏRTAC “Ukrainskaya pravda” qəzetinə istinadla xəbər verir ki, Prezident Viktor Yuşşenkonun fikrincə, Ali Radanın deputatı Pyotr Poroşenkonun Rusiya ərazisinə buraxılmaması əsassızdır və bu, siyasi mülahizələrdən irəli gəlir.
“Bizim Ukrayna” blokunun liderlərindən biri və Prezidentin xaç atası olan Poroşenkoya fevralın 3-də Sankt-Peterburq hava limanında Rusiya ərazisinə keçməyə icazə verilməmişdir. Bundan sonra Rusiya XİN-də bildirmişlər ki, onun ölkəyə gəlməsinə qadağanın səbəbi “Ukrayna ərazisinə qədəm qoyması qadağan olunmuş Rusiya vətəndaşları barəsində Ukrayna tərəfinin tətbiq etdiyi mövcud qüsurlu praktika ilə bağlıdır”.
Bunun cavabında Viktor Yuşşenko demişdir ki, Ukraynada Rusiya vətəndaşları üçün “qara siyahı” yoxdur. Bu, belə məsələlərdən sui-istifadə etməyə çalışan siyasətbazların uydurmasıdır.
Bununla yanaşı, o etiraf etmişdir ki, Ukrayna Təhlükəsizlik Xidməti Rusiyanın müəyyən şəxslərinin Ukrayna ərazisinə buraxılmaması üçün tədbirlər görmüşdür və hər bir belə fakt barəsində “rəsmi izahat” verilmişdir. Onun sözlərinə görə, bu rəsmi izahatlar sübuta yetirilmiş və beynəlxalq normalara uyğun olmuşdur.
Xatırladaq ki, Ukrayna RF Dövlət Duması sədrinin müavini Vladimir Jirinovskinin və Dövlət Dumasının deputatı Konstantin Zatulinin ölkə ərazisinə daxil olmasını qadağan etmişdir.
Bölmənin digər xəbərləri
