Bakı, 27 aprel, AZƏRTAC

Tarixi Zəfərimizdən ötən iki ildən artıq dövrdə Ermənistanın bölgədə dayanıqlı sülhün təmin edilməsi üçün Azərbaycanın sülh təklifinin reallığa çevrilməsi istiqamətində konkret addım atmaq barədə düşünməməsi mütəmadi olaraq 2020-ci il tarixli 10 noyabr üçtərəfli Bəyanatın tələblərini kobud şəkildə pozması sənəddə əksini tapan müddəaların təkrar-təkrar xatırladılmasını şərtləndirir. Üçtərəfli Bəyanatda qeyd edilib ki, Rusiya Federasiyasının sülhməramlı kontingenti erməni silahlı qüvvələri qalıqlarının Azərbaycan ərazisindən çıxarılması ilə paralel şəkildə yerləşdirilir. Tərəflərin razılığı əsasında növbəti üç il ərzində Laçın yolu üzrə yeni hərəkət marşrutunun inşası planı müəyyən edilməsi və bununla da həmin marşrutun mühafizəsi üçün Rusiya sülhməramlı kontingentinin gələcək yerdəyişməsi nəzərdə tutulurdu. Azərbaycan Laçın yolu üzrə hər iki istiqamətdə vətəndaşların, nəqliyyat vasitələrinin və yüklərin hərəkətinə təhlükəsizlik zəmanəti verdi. Sənədin imzalanmasından ötən müddət ərzində Azərbaycan tərəfi üzərinə düşən öhdəlikləri yüksək səviyyədə yerinə yetirərək sülh gündəliyinin müəllifi kimi mövqeyini möhkəmləndirdiyi halda Ermənistan öhdəliklərin icrasında maraqlı olmadığını hər addımında təsdiqləyir. Digər tərəfdən bu məqamı da unutmayaq ki, o zaman Ermənistan Laçın yolunun 20 kilometr enində olmasında və yolun Ermənistanın nəzarətində olmasında təkid edirdi. Lakin dövlətimizin başçısı, Müzəffər Ali Baş Komandan İlham Əliyevin sərt, qətiyyətli və prinsipial mövqeyi nəticəsində yol 5 kilometr enində müəyyən edildi, 3 il müddətində yeni yolun istifadəyə verilməsi və Laçın rayonunun mərkəzinin Azərbaycana qaytarılması ilə bağlı prinsipial müddəalar üçtərəfli Bəyanatda əksini tapdı. Bununla bərabər, yeni yolun ilyarıma istifadəyə verilməsi, Ermənistanın bu yolun öz ərazisindən keçən 7 kilometrlik hissəsinin tikintisini süni şəkildə ləngitməsi, hətta 2022-ci ilin avqustunda bununla bağlı təxribatlar törətməsi postmünaqişə dövrünün reallıqları sırasındadır. Ermənistan hər addımda 44 günlük İkinci Qarabağ müharibəsində məğlubiyyəti ilə barışmadığını, sülh müqaviləsinin imzalanması prosesinin uzanmasında maraqlı olduğunu təsdiqləyir.

Bu fikirləri Yeni Azərbaycan Partiyası (YAP) Xətai rayon təşkilatının sədri, siyasi elmlər doktoru Vüqar Rəhimzadə KİV-ə açıqlamasında bildirib.

Vüqar Rəhimzadə qeyd edib ki, Müzəffər Ali Baş Komandan İlham Əliyev ötən il avqustun 26-da özünün tviter səhifəsində belə bir paylaşım etdi: “Bu gün, avqustun 26-da biz – azərbaycanlılar Laçın şəhərinə qayıtmışıq. Azərbaycan Ordusu Laçın şəhərinə yerləşdi. Zabux və Sus kəndləri nəzarətə götürüldü. Bütün laçınlıları və Azərbaycan xalqını bu münasibətlə təbrik edirəm. Yaşasın Laçın! Yaşasın Azərbaycan!”. Bu müjdədən çox keçmədi ki, Müzəffər Ali Baş Komandan sentyabrın 21-də Laçın şəhərinə səfər etdi və şəhərin mərkəzində Azərbaycan Bayrağını ucaltdı.

Göründüyü kimi, Azərbaycan istədiyinə nail olur. Atılan addımlar Azərbaycanın mövqeyinin dəyişməzliyini, qarşıya qoyduğu hər bir hədəfə yüksək səviyyədə nail olmaq üçün səylər göstərdiyini nümayiş etdirir. Hər bir çağırışın real həyatda öz əksini tapması Azərbaycanın ədalətə və beynəlxalq hüquqa əsaslanan siyasətinin nəticəsidir. Azərbaycan üzərinə götürdüyü bütün öhdəliklərinə sadiqdir. Dövlət başçısı İlham Əliyev bu ilin yanvarında yerli televiziya kanallarına müsahibəsində cari ilin hədəflərini açıqlayarkən bu il laçınlıların doğma Laçına qayıdacaqlarını bildirdi və diqqəti bu əminliyi əsaslandıran məqamlara yönəltdi. Dövlətimizin başçısının tapşırıqlarına uyğun olaraq bu ərazilərimizdə geniş miqyas alan bərpa-quruculuq işləri, eyni zamanda, cənab İlham Əliyevin qətiyyəti və ardıcıl siyasəti nəticəsində qazanılan uğurlar bu hədəfə də zamanında nail olacağımızı şərtləndirir. Aprelin 23-də Laçın-Xankəndi yolunda Azərbaycanın nəzarət-buraxılış məntəqəsinin yaradılması təkcə ermənilərin növbəti təxribatlarının qarşısını almadı, həm də ölkəmizin öz ərazi bütövlüyünü tam bərpa etdiyini bir daha təsdiqlədi. Təbii ki, atılan hər bir addımı şərtləndirən mühüm məqamlar mövcuddur. Ermənilərin Laçın yolu ilə Qarabağa silah-sursat daşımaları, Qarabağda hərbi kontingent formalaşdırmağa cəhd göstərmələri, eyni zamanda, Qarabağda təbii sərvətlərimizin talanması və Laçın yolu ilə Ermənistana daşınması Azərbaycanı narahat etməyə bilməz. Dövlətimiz bununla bağlı ən yüksək tribunalardan sərt mövqeyini açıqlasa da, qarşı tərəf yenə də qanunsuz əməllərini, təxribatlarını davam etdirməklə açıq-aşkar beynəlxalq hüququn norma və prinsiplərinə hörmətsizlik nümayiş etdirməkdə idi. O da məlumdur ki, təbii sərvətlərimizin qanunsuz istismarına etiraz olaraq ekofəallar ötən il dekabrın 12-dən Laçın-Xankəndi yolunun Şuşa ərazisindən keçən hissəsində dinc aksiyaya başlayıblar. Fəallar Qarabağ ərazisində Azərbaycanın təbii sərvətlərinin talan edilməsinə etirazlarını bildirir, haqlı tələblərinin yerinə yetirilməsini istəyirlər.

YAP Xətai rayon təşkilatının sədri bir daha diqqəti dünyada Ermənistan və havadarları tərəfindən Azərbaycana qarşı kampaniya təşkil edilməsinə, xarici mediada Azərbaycan əleyhinə aparılan qara piar kampaniyasına yönəldib. Bildirib ki, heç bir təzyiq Prezident İlham Əliyevi öz qətiyyətli və ədalətli mövqeyindən daşındıra bilmədi. Azərbaycan öz haqqını tələb etməkdə davam etdi, hətta Azərbaycan Respublikasının Prezidenti Administrasiyası Qarabağ ermənilərinə reinteqrasiya və mövcud problemlərin həlli ilə bağlı müraciət ünvanlayaraq onların nümayəndələrini Bakıya dəvət etdi. Lakin Azərbaycanın bütün çağırışları cavabsız qaldı. Bütün bunlar Ermənistanın sülh müqaviləsinin imzalanmasında maraqlı olmadığını, himayədarlarına arxalanaraq təxribatlar törətməklə, qərəzli, heç bir əsası olmayan bəyanatlar səsləndirməklə beynəlxalq ictimaiyyəti çaşdırmağa səy göstərdiklərini təsdiqləyir. Azərbaycan tərəfi ilk gündən Qarabağda yaşayan ermənilərin təhlükəsizliyinin təmin ediləcəyini bildirir. Dövlətimizin başçısı İlham Əliyev “Mən demişəm, bir daha demək istəyirəm ki, orada Azərbaycan Bayrağı altında yaşamaq istəyənlər üçün şərait yaradılacaq. Azərbaycan vətəndaşları kimi, onların hüquqları da, onların təhlükəsizliyi də təmin olunacaq… biz onların nəinki hüquqlarını və təhlükəsizliyini təmin edəcəyik, onlar daha yaxşı yaşayacaqlar” fikirləri ölkəmizə qarşı qara piar kampaniyası aparanlara tutarlı cavabdır.