X X X
Prezident paytaxt sakinləri və şənlik iştirakçıları ilə mehribancasına görüşdü, hal-əhval tutdu, onları bayram münasibətilə təbrik etdi.
İncəsənət ustaları, bədii özfəaliyyət kollektivləri xalqımızın adət-ənənələrini nümayiş etdirdilər. “Kosa, Keçəl və Bahar qız” tamaşası, rəngarəng konsert proqramı böyük maraqla qarşılanırdı. Bir tərəfdə isə gənc pəhləvanlar xalça üzərində qurşaq tutur, idmançılar öz məharətlərini göstərirdilər. Şənlik iştirakçıları qədim xalq mahnılarını ifa edir, milli musiqinin sədaları altında rəqs edirdilər. Novruz şənliklərinin elementlərindən olan kəndirbaz və xoruz döyüşü də unudulmamışdı.
Prezident ailə üzvləri ilə birlikdə bayram şənliyini daha da rövnəqləndirən balaca bədii gimnastların çıxışlarına tamaşa etdi, onlara uğurlar arzuladı.
Paytaxtın balaca sakinləri dövlətimizin başçısını özlərinə xas səmimiyyətlə salamladılar, yazın gəlişinə, Vətənə həsr olunmuş şeir söylədilər:
Yenə də yam-yaşıl geyinir dağlar,
Göz kimi durulur qaynar bulaqlar,
Əriyir güneylər döşündəki qar,
Yağış da isladır o göy çəməni,
Təbiət ilhama çağırır məni.
Muğana su gəlir, Milə su gəlir,
Axışıb öz eli, bol ruzu gəlir,
Torpağa insanın arzusu gəlir,
Bağrıma basıram ana Vətəni,
Bu ülfət ilhama çağırır məni.
X X X
Sonra Prezident İlham Əliyevi meyxanaçılar, Novruz bayramının əsas personajları olan Kosa və Keçəl qarşıladılar. Kosa dövlətimizin başçısına müraciətlə dedi:
- Cənab Prezident, bayramınız mübarək. Nəhayət, gözlədiyimiz vaxt gəlib çatdı. Bilirsiniz ki, hər il Novruz bayramında Sizinlə görüşürük. Biz el-el, oba-oba, kəndbəkənd hər yeri gəzirik. Camaat Sizdən o qədər razılıq edir ki, sevincimizin həddi-hüdudu olmur. Ulu öndərimizin siyasətini Siz çox uğurla davam etdirirsiniz.
İqtisadi inkişaf, sabitlik, xalqımızın əhval-ruhiyyəsinin yüksəlməsi və digər işlərə görə mən oynayıram, bu Keçəl isə paxıllığımızı çəkir. Cənab Prezident, paxıllığından başından tük də bitmir. Deyəsən, müxalifətə keçib, hər yerdə məndən danışır. Hər il Prezidentlə yumurta döyüşdürür, amma uduzur.
Kosa və Keçəl Prezidentlə və qonaqlarla yumurta döyüşdürdülər. Keçəl yenə də uduzdu. Onlar dövlətimizin başçısını və ailə üzvlərini bayram münasibətilə təbrik etdilər.
Aşıqlar ulu öndərin və Prezidentin şərəfinə mahnı oxudular. Paytaxt rayonlarından Novruz şənliyində iştirak edən gənc Heydərçilər dövlətimizin başçısını mehribanlıqla salamladılar.
Prezident İlham Əliyev daha sonra Qız qalasına gələrək, bayram gəzintisinə çıxmış Bakı sakinlərini və respublika paytaxtının qonaqlarını bayram münasibətilə təbrik etdi.
Novruz bayramı münasibətilə keçirilən şənliklərdə Baş nazir Artur Rasizadə, Milli Məclisin sədri Oqtay Əsədov, Prezidentin İcra Aparatının rəhbəri Ramiz Mehdiyev, Bakı Şəhər İcra Hakimiyyətinin başçısı Hacıbala Abutalıbov, Milli Məclisin deputatları, nazirlər və digər rəsmi şəxslər iştirak edirdilər.
Bölmənin digər xəbərləri
