X X X
Müşavirəni giriş nitqi ilə açan dövlətimizin başçısı, Naxçıvanın dinamik inkişaf etdiyini, muxtar respublikanın digər rayonlarında da abadlıq-quruculuq işlərinin görüldüyünü bildirərək vurğuladı ki, bu qədim və strateji əhəmiyyəti olan diyarın möhkəmlənməsi, güclənməsi bizim üçün çox önəmlidir. Prezident əhalinin elektrik enerjisi və qazla təminatından, onlara göstərilən tibbi xidmətin səviyyəsinin yüksəldilməsindən danışaraq bildirdi ki, Azərbaycanda həyata keçirilən sosial siyasət insanların həyat səviyyəsinin yaxşılaşdırılmasına xidmət edir. Minimum əmək haqqı insanların minimum tələbatını, ehtiyacını ödəməlidir deyən dövlətimizin başçısı yanvarın 1-dən minimum əmək haqqının 30 manatdan 40 manata çatdırılması üçün 200 milyon manat vəsaitin nəzərdə tutulduğunu və hazırda ölkədə 630 min nəfərin minimum əmək haqqı aldığını bildirdi.
Ulu öndər Heydər Əliyevin tarixi xidmətlərini xatırladan, onun müəyyənləşdirdiyi xəttin bu gün uğurla davam etdirildiyini vurğulayan Prezident İlham Əliyev dünyada ən yüksək iqtisadi artımın Azərbaycanda baş verdiyini, son üç ildə 500 min yeni iş yerinin açıldığını qeyd etdi.
Dövlətimizin başçısı Ermənistanın Azərbaycana qarşı apardığı işğalçılıq siyasətindən geniş bəhs etdi, ümummilli lider Heydər Əliyevin səyi nəticəsində muxtar respublikanın erməni işğalına məruz qalmadığını söylədi. Dağlıq Qarabağ münaqişəsinin həlli ilə bağlı aparılan danışıqlardan söhbət açan Prezident İlham Əliyev Azərbaycanın ərazi bütövlüyünün bütün dünya dövlətləri tərəfindən tanındığını xatırlatdı. O, əmin olduğunu vurğuladı ki, Ermənistan gələcəkdə Minsk qrupu tərəfindən verilən təkliflərə razılığını bildirəcək, vaxt uzatmaq üçün bəhanə axtarmayacaqdır.
Prezident İlham Əliyev həmçinin son vaxtlar Ermənistan rəsmilərinin verdikləri bəyanatlara da münasibət bildirərək dedi ki, bəzən bu bəyanatlar təxribat xarakteri daşıyır. Dağlıq Qarabağa heç vaxt müstəqillik verilməyəcəkdir, Azərbaycanın güclənməsi onları təşvişə salıbdır. Onlar qanunsuz referendum keçirməklə özlərini pis vəziyyətə salıb, biabır ediblər. Nüfuzlu beynəlxalq təşkilatlar – ATƏT, Avropa İttifaqı, Avropa Şurası, habelə dünya dövlətləri bu qanunsuz aksiyanı qınamışdır.
Dövlətimizin başçısı Naxçıvan Muxtar Respublikasının 2007-ci il üçün büdcəsinin 161,8 milyon manat və ya 180 milyon dollar təşkil etdiyini bidirərək vurğuladı ki, gələcəkdə muxtar respublikanın büdcəsi Ermənistanın ümumi büdcəsindən xeyli çox olacaqdır.
Sonra Naxçıvan MR Ali Məclisinin sədri Vasif Talıbov görülən işlər barədə məruzə etdi.
Prezident İlham Əliyev müşavirəyə yekun vuraraq dedi ki, 1993-cü ildə hakimiyyətə gələn Heydər Əliyevin siyasəti olmasaydı Azərbaycan indiki səviyyəyə çatmayacaqdı. Ulu öndər bizim ürəyimizdə yaşayır, bizim siyasətimizin mənbəyi xalqdır. Fəxr edirəm ki, bu siyasət yaşayır. Azərbaycanın xoşbəxt gələcəyi üçün, xoşbəxt yaşaması üçün bundan sonra da bütün işlər görüləcəkdir.
Bölmənin digər xəbərləri
