X X X
Buraya toplaşan paytaxt sakinləri, inşaatçılar açılış mərasiminə gələn Prezident İlham Əliyevi hərarətlə qarşıladılar.
Körpünün tikintisinə bu ilin aprelində başlanmışdır. Ümumi uzunluğu 340 metr olan körpüdə hərəkət üçün 4 cərgəli yol salınmışdır. Körpünün istinad divarlarının uzunluğu 480 metrdir. Baş podratçı “Gəncəkörpütikinti-2” ASC işin keyfiyyətlə, layihəyə uyğun yerinə yetirilməsinə xüsusi diqqət yetirmişdir. Körpünün ətrafı abadlaşdırılmış, yaşıllıq zolağı salınmış, işıqlandırma sistemi yenidən qurulmuşdur ki, bu da şəhərimizə xüsusi yaraşıq verir.
Prezident İlham Əliyev körpünün rəmzi açılışını bildirən lenti kəsdi, körpünü gəzdi, işin keyfiyyəti ilə maraqlandı.
Körpünün divarına “Yolötürücüsü Azərbaycan Respublikasının Prezidenti zati-aliləri cənab İlham Əliyevin sərəncamı əsasında 2006-cı ildə inşa edilmişdir” sözləri yazılmış xüsusi lövhə vurulmuşdur.
Bu əzəmətli yol qovşağının da müasir standartlara cavab verdiyini, xarici görünüşünün də gözəl olduğunu vurğulayan Prezident İlham Əliyev müxtəlif istiqamətlərdə salınan yeni yollara da baxdı, paytaxtda avtomobillərin sayının artmasını nəzərə alaraq, nəqliyyat vasitələrinin hərəkətinin asanlaşdırılması, tıxacların aradan qaldırılması məqsədi ilə əlavə tədbirlərin görülməsi, xüsusi planın hazırlanması barədə Nəqliyyat Nazirliyinin və Bakı Şəhəri İcra Hakimiyyətinin rəhbərlərinə lazımi tövsiyə və tapşırıqlar verdi.
Bölmənin digər xəbərləri
