RƏSMİ SƏNƏDLƏR

Son zamanlar əcnəbilərin və vətəndaşlığı olmayan şəxslərin Azərbaycan Respublikasında yaşayış yeri və olduğu yer üzrə qeydiyyatı ilə bağlı bir sıra çatışmazlıqlar və qanun pozuntuları müəyyən edilmişdir. Qüvvədə olan "İmmiqrasiya haqqında", "Əcnəbilərin və vətəndaşlığı olmayan şəxslərin hüquqi vəziyyəti haqqında", "Ölkədən getmək, ölkəyə gəlmək və pasportlar haqqında" və "Yaşayış yeri və olduğu yer üzrə qeydiyyat haqqnıda" Azərbaycan Respublikası qanunlarının və digər qanunvericilik aktlarının tələblərinə məhəl qoymayaraq əcnəbilərin və vətəndaşlığı olmayan şəxslərin Azərbaycan Respublikasında olma müddətlərinə riayət olunmur. Əcnəbilərin Azərbaycan Respublikasında vizada göstərilən müddətdən artıq qalmasının qeyri-qanuniliyini nəzərə alaraq, belə halların aradan qaldırılması və qanunvericiliyin tələblərinin yerinə yetirilməsi məqsədi ilə qərara alıram:

1. "Yaşayış yeri və olduğu yer üzrə qeydiyyat haqqında" Azərbaycan Respublikası Qanununun tətbiqi haqqında Əsasnamənin təsdiq edilməsi barədə" Azərbaycan Respublikası Qanununun tətbiq edilməsi haqqında" Azərbaycan Respublikası Prezidentinin 1999-cu il 30 dekabr tarixli 244 saylı Fərmanına aşağıdakı məzmunda 3-cü bənd əlavə edilsin:

"3. Azərbaycan Respublikası Daxili İşlər Nazirliyinin müvafiq qurumları əcnəbilərin yaşayış yeri və olduğu yer üzrə qeydiyyata alarkən əcnəbilərin Azərbaycan Respublikasında vizada göstərilən müddətdən artıq qalmasına yol verməsinlər".

2. Azərbaycan Respublikasının Xarici İşlər Nazirliyinə tapşırılsın ki, Azərbaycan Respublikasına gəlmiş əcnəbilər və ya vətəndaşlığı olmayan şəxslər üçün vizanın müddətinin uzadılması məsələsini həll edərkən hər konkret halda onların Azərbaycan Respublikasında qalmasının səbəblərini araşdırsın və zərurət olmadıqda vizanın müddətinin uzadılmasına yol verməsin.

3. Azərbaycan Respublikasının Nazirlər Kabineti Azərbaycan Respublikasına gəlmiş əcnəbilər və vətəndaşlığı olmayan şəxslər üçün vizaların müddətlərinin uzadılması qaydalarını bir ay müddətində təsdiq etsin və bu barədə Azərbaycan Respublikasının prezidentinə məlumat versin.

Heydər ƏLİYEV,

Azərbaycan Respublikasının Prezidenti.

27 sentyabr 2003-cü il.