Xocalı yol gözləyir
Goranboy, 24 fevral, Rauf Hacıyev, AZƏRTAC
İyirmi dörd il əvvəl, 1992-ci il fevralın 26-da Ermənistan hərbi birləşmələri Xocalı şəhərində soyqırımı aktı həyata keçirib. Düşmənin şəhərə hücumu zamanı burada 3 minə yaxın insan olub. Soyqırımı nəticəsində 613 nəfər öldürülüb. Onlardan 106-sı qadın, 63-ü uşaq, 70-i qoca olub. 8 ailə tamamilə məhv edilib, 25 uşaq hər iki valideynini, 130 uşaq valideynlərindən birini itirib. Faciə baş verən gecə 1275 nəfər dinc sakin girov götürülüb ki, onlardan da 150-nin taleyi indi də məlum deyil.
AZƏRTAC xəbər verir ki, fevralın 24-də Goranboy rayonunun Aşağı Ağcakənd qəsəbəsində keçirilən “Xocalı yol gözləyir” adlı faciə qurbanlarının kütləvi anma mərasimində bu barədə ətraflı danışılıb. Tədbir Müdafiə Nazirliyinin, Goranboy rayonu və Xocalı rayonu icra hakimiyyətlərinin birgə təşkilatçılığı ilə reallaşıb.
Tədbir çərçivəsində Xocalı soyqırımına həsr olunan kütləvi tamaşa nümayiş etdirilib.
Əməkdar İncəsənət Xadimi, polkovnik Abdulla Qurbaninin ssenarisi və rejissorluğu ilə səhnələşdirilən kütləvi tamaşa Azərbaycan Silahlı Qüvvələrinin əsgərləri, Müdafiə Nazirliyinin Həzi Aslanov adına Mərkəzi Zabitlər evinin Mahnı və Rəqs Kollektivi, Cəfər Cabbarlı adına Gəncə Dövlət Dram Teatrının aktyorları, həmçinin Xocalı rayonu və Goranboy rayonlarının birləşmiş özfəaliyyət kollektivlərinin 200-dən artıq iştirakçısı tərəfindən canlandırılıb. Kütləvi tamaşanın ssenarisi Xocalı faciəsinin şahidləri və soyqırımı həyata keçirən 366-cı motoatıcı alayın qeyri-erməni millətindən olan zabitlərinin şəxsi qeydlərinə, o cümlədən bir sıra arxiv sənədlərinə və tarixi mənbələrə istinad edilərək yazılıb.
Tədbirdə Müdafiə Nazirliyinin nümayəndələri, general-mayor Rasim Əliyev və general-mayor Hikmət Həsənov, Goranboy Rayon İcra Hakimiyyətinin başçısı Nizaməddin Quliyev, Xocalı Rayon İcra Hakimiyyəti başçısının müavini Vahid Əliyev, Azərbaycan Silahlı Qüvvələrinin bölgədəki şəxsi heyəti, həmçinin Xocalı faciəsinin şahidləri və Goranboy rayonu ictimaiyyətinin nümayəndələri iştirak ediblər.
Çıxış edənlər bildiriblər ki, bu qanlı qırğını törədənlər cəzasız qalmamalıdırlar. Ermənistanın hərbi təcavüzü dünya ictimaiyyəti tərəfindən ittiham edilməlidir. Beynəlxalq təşkilatlar, dünya dövlətlərinin parlamentləri Azərbaycan torpaqlarında törədilən hərbi cinayətə - Xocalı soyqırımına əsl genosid hadisəsi kimi beynəlxalq siyasi-hüquqi qiymət verməlidirlər.
Qeyd edilib ki, Xocalı faciəsi qurbanlarının xatirəsi daim uca tutulur və xalqımız heç vaxt torpaqlarının işğalı ilə barışmayacaq.
Bölmənin digər xəbərləri
