XORVATİYA PREZİDENTİ STEPAN MESİÇİN NİTQİ
- Çox hörmətli cənab Prezident Əliyev!
Hörmətli Azərbaycan Respublikasının nümayəndələri!
Xanımlar və cənablar!
İlk növbədə, icazə verin, mənə və nümayəndə heyətimin üzvlərinə göstərilmiş səmimi qonaqpərvərliyə görə öz minnətdarlığımı bildirim. Bakıya gəldiyimiz anlardan özümüzü dostların əhatəsində hiss edirik və deməliyəm ki, bu cür dostluq mühiti bu gün axşam qeyri-rəsmi şəraitdə davam etdirəcəyimiz danışıqlarımızın uğurlu olmasına zəmin yaradır.
Azərbaycana səfər edən Xorvatiya Respublikasının ilk Prezidenti olmaq şərəfinin mənim qismətimə düşməsindən son dərəcə məmnunam. Bugünkü rəsmi danışıqlardan sonra mətbuat üçün verdiyim bəyanatda dediyim kimi, cənab Prezident Əliyev, ikitərəfli münasibətləri inkişaf etdirməyə hazır olduğunuza dəlalət edən ilk işarəni iki il bundan əvvəl Zaqrebə etdiyiniz səfərlə məhz Siz verdiniz.
Mən isə öz növbəmdə, bu səfərimlə Xorvatiya Respublikasının Azərbaycan-Xorvatiya münasibətlərinin inkişafı prosesinin davam etdirilməsinə, onların hər iki ölkənin rifahı naminə yeni səviyyəyə qaldırılmasına, təkmilləşdirilməsinə və genişləndirilməsinə olan möhkəm istəyini və əzmini bildirmək istəyirəm.
Ölkələrimizin zəngin və kəşməkəşli tarixində təmas nöqtələri və hətta, oxşarlıq da var. Bu, qurduğumuz əməkdaşlığın bünövrəsinin bir hissəsini təşkil edir. Lakin həmin əməkdaşlığın əsl və möhkəm bünövrəsi obyektiv şəkildə mövcud olan imkanlar, heç də tükənməmiş potensial, hər iki dövlətin maraqlarına cavab vermək məqsədi ilə tərəfdaşlıq və bərabər hüquqlu əməkdaşlıq münasibətlərinin qurulmasına hər iki tərəfin iradəsinin olmasıdır.
Müstəqilliyin qazanılması prosesinin gedişində Xorvatiya zorla cəlb olunduğu qanlı müharibədən keçmişdir. Həmin müharibənin nəticələrini biz bu gün də hiss edirik. Lakin məhz həmin təcrübə sayəsində sülh və əməkdaşlıq bizim xarici siyasətimizin əsas məqsədinə çevrilmişdir. Çox şadam ki, deyə bilərəm: bu cür konsepsiya Xorvatiya vətəndaşlarının tam əksəriyyəti tərəfindən bəyənilir və qəbul olunur.
Biz regionumuzda son müharibələr zamanı törədilmiş cinayətlərə görə dəqiq məsuliyyət tələb edirik, lakin biz bunu sırf fərdi əsasda müəyyən edirik. Biz kollektiv məsuliyyəti ən qəti şəkildə rədd edirik və tam əminik ki, bu konsepsiya indi və təbii ki, gələcəkdə xalqlar və dövlətlər arasında qurulmalı olan əlaqələr üçün fəlakətlidir.
Avropa İttifaqına qoşulmaq barədə danışıqlar aparmağımıza baxmayaraq, biz Avropa İttifaqına üzv olmayan ölkələrlə, habelə dünyanın digər hissəsindəki dövlətlərlə əməkdaşlığa açığıq. Biz Avropa dövlətiyik, lakin maraqlarımız Avropanın hüdudlarının qurtardığı yerlə məhdudlaşmır.
Beynəlxalq terrorçuluğa qarşı mübarizənin, o cümlədən terrorçuluğu yaradan şəraitlərin aradan qaldırılmasının qətiyyətli tərəfdarıyıq, lakin bununla belə, mübahisələrin, hətta uzun illər ərzində həlli yollarının araşdırılması yolu ilə də olsa, dincliklə aradan qaldırılmasını dəstəkləyirik.
Biz iqlim dəyişiklikləri və qlobal istiləşmə problemlərinin həllinin başlanmasını alqışlayırıq, ancaq eyni zamanda, azad bazar şəraitində enerji təhlükəsizliyinin təmin edilməsinin zəruriliyini bildiririk. Bu sahədə tarazlıq təmin edilməlidir, çünki enerji resurslarına nə qədər ehtiyacımız olsa da, bir o qədər də bəşəriyyətin sağ qalmasının əsasını təşkil edən təbii ətraf mühitin dəstəklənməsi və qorunub saxlanmasına ehtiyacımız vardır. Biz bütün bu məsələlərdə əməkdaşlıq edə bilərik və əminəm ki, bu cür işbirliyinə doğru aparan düzgün yoldayıq.
Mən Prezident Əliyevin uğurları və möhkəm cansağlığı şərəfinə, dost Azərbaycanın və onun vətəndaşlarının tərəqqisi şərəfinə, Azərbaycan-Xorvatiya münasibətlərinin inkişafı şərəfinə, sülh, təhlükəsizlik və sabitliyin hökm sürdüyü dünyanın şərəfinə badə qaldırıram.
Sağ olun.
(Dövlət başçılarının nitqləri diqqətlə dinlənildi və alqışlarla qarşılandı).
Bölmənin digər xəbərləri
