XRİSTOFOR KOLUMB ƏSİL MÜSTƏBİD İMİŞ?
Tədqiqatçılar ötən il İspaniyanın Salamanka şəhəri arxivlərində 1500-cü ilə aid sənədlərə rast gəlmişlər. Söhbət Kolumbun İspaniyanın Yeni Dünyadakı ilk koloniyası Santo-Dominqonun qubernatoru olduğu vaxtlarda tabeliyindəki adamlarla sərt rəftarı və hindilərin başına gətirdiyi müsibətlərlə əlaqədar hökmdar ər-arvad – Kastiliya kraliçası İzabella və Araqon kralı Ferdinandın təşəbbüsü ilə araşdırma materiallarından gedir.
46 səhifəlik sənəddə 23 adamın şahid ifadələri verilmişdir. Sən demə, admiral adamları məhkəməsiz cəzalandırır, edam edir, onlara işgəncə verir, habelə aborigenlərin xristianlığa keçmələrinə icazə vermirdi, çünki əks halda onları qula çevirmək mümkün olmazdı.
Aparılmış araşdırmanın nəticəsinə görə, Kolumb bütün titullarından məhrum edilərək, qandallanmış vəziyyətdə Amerikadan İspaniyaya gətirilmişdir. Lakin keçmiş xidmətlərinə görə hökmdarlar tərəfindən əfv edilərək, sadəcə, saraydan uzaqlaşdırılmışdır.
Səyyah 1506-cı ildə yoxsulluq içində və hamı tərəfindən unudulmuş vəziyyətdə dünyasını dəyişmişdir.
Bölmənin digər xəbərləri
