Bakı, 9 iyun, AZƏRTAC

Ölkəmizin ictimai-siyasi həyatında aparıcı rol oynayan Yeni Azərbaycan Partiyası (YAP) yeniliyə, təkmilləşməyə xüsusi önəm verdiyini hər addımında təsdiqləyir. Yarandığı gündən sözlə əməl birliyi, monolitliyi partiyanın davamlı uğurlarında, sıralarını kəmiyyət və keyfiyyət baxımından zənginləşdirməsində əhəmiyyətli rol oynayır. YAP müxtəlif təbəqələrdən olan insanları öz sıralarında birləşdirərək onların arzu və istəklərini, təşəbbüslərini reallığa çevirir, cəmiyyətin avanqard qüvvəsi kimi rolunu artırır.

On səkkiz minə yaxın üzvü 141 ərazi partiya təşkilatında birləşdirən YAP Xətai rayon təşkilatının partiyanın yeni Nizamnaməsinə və Proqramına uyğun olaraq fəaliyyətini təkmilləşdirməsi, sıralarını daha da zənginləşdirməsi də bu silsilədəndir. Belə ki, iyunun 9-da YAP Xətai rayon təşkilatının ərazi partiya təşkilatları sırasına daha biri - “Ağ şəhər” ərazi partiya təşkilatı əlavə olundu.

AZƏRTAC xəbər verir ki, bu sözləri yeni təsis yaradılan ərazi partiya təşkilatının təsis yığıncağında ərazi partiya təşkilatına gələcək fəaliyyətində uğurlar arzulayan YAP Xətai rayon təşkilatının sədri Vüqar Rəhimzadə deyib. Rayon təşkilatının sədri çıxışında diqqəti partiyanın yarandığı tarixə və keçdiyi inkişaf yoluna yönəldib: “Yeni Azərbaycan Partiyasının milyonların partiyası kimi xarakterizə olunması səbəbsiz deyil. YAP yarandığı gündən ümumxalq partiyasına çevrildi. Partiya 1992-ci ildə müxtəlif bölgələrdən olan 550 nümayəndənin iştirakı ilə təsis olunmasına baxmayaraq, qısa zamanda sıralarını genişləndirdi. Hazırda YAP-ın 800 minə yaxın üzvü var. Bu, hər zaman qeyd edildiyi kimi, sadəcə, bir statistika deyil. Bu, Azərbaycanın dünəninin, bu gününün və gələcəyinin əsası kimi qəbul olunan Heydər Əliyev ideyalarına sədaqətin, son 18 ildən artıq dövrdə bu xətti uğurla davam etdirən Prezident İlham Əliyevin siyasətinə böyük inamın göstəricisidir”.

Vüqar Rəhimzadə vurğulayıb ki, tarixi Azərbaycanın dövlət müstəqilliyinin bərpası tarixi ilə üst-üstə düşən Yeni Azərbaycan Partiyası bu illər ərzində çətin və şərəfli yol keçib: “Yeni Azərbaycan Partiyasının məqsəd və məramı hər bir ölkənin inkişafında əsas amil olan seçki proseslərinə qatıldığı hədəflərdən, şüarlardan da aydın görünür. Vaxtilə “Yeni Azərbaycan uğrunda!” devizini özünün başlıca məramı seçən YAP bu gün yeni hədəflərə doğru “İlhamla irəli!” söyləyir. Ulu öndər Heydər Əliyevin yaradıcısı olduğu partiyanın hər bir üzvü dahi liderin irsinin təbliğatçılarıdır. Ümummilli Lider Yeni Azərbaycan Partiyası yaradılanda necə böyük əminliklə “YAP dünənin, bugünün və gələcəyin partiyasıdır”,- deyərək bəyan etmişdisə, 1993-cü ildə xalqın təkidli tələbi ilə hakimiyyətə qayıdışından sonra “Azərbaycan dünyaya Günəş kimi doğacaq”,- söyləyərək əminliyini ifadə etdi. Ulu öndər Heydər Əliyevin düşünülmüş və məqsədyönlü siyasəti həm Azərbaycanın, həm də Yeni Azərbaycan Partiyasının bugünkü həyatında, inkişafında öz sözünü deyir. Məhz bu əminlik fonunda Ümummilli Lider 2003-cü ildə növbəti inamın və etimadın ünvanını göstərərkən cənab İlham Əliyevi və Yeni Azərbaycan Partiyasını nəzərdə tuturdu”.

YAP Xətai rayon təşkilatının sədri yeni ərazi partiya təşkilatının yaranmasının məhz ulu öndər Heydər Əliyevin xalqın təkidli tələbi ilə hakimiyyətə qayıdışının başlanğıc günü olan 9 iyun tarixinə təsadüf etdiyini xüsusi qeyd edərək bildirib ki, bugünkü tədbir yeni ərazi partiya təşkilatının həyatında ikiqat bayram olacaq: “Ulu öndər Heydər Əliyevin 9 iyun 1993-cü il tarixində Bakıya gəlişi ölkəmizin həyatında fərqli bir mənzərəni, insanlarda sabaha inamı yaratdı. Bu inam, xalqın Ümummilli Liderin ətrafında sıx birləşməsi, son 18 ildən artıq dövrdə Heydər Əliyev siyasətinə dəstəkləri 44 günlük Vətən müharibəsində tarixi Zəfərimizi şərtləndirən əsas amillərdən oldu. Birliyimiz, həmrəyliyimiz hər bir hədəfə yüksək səviyyədə nail olmağımıza əsas verir”.

Sonda təşkilatı məsələlərə baxılıb. Kənan İsmayılov YAP Xətai rayon təşkilatı “Ağ şəhər” ərazi partiya təşkilatının sədri, Nəbi Süleymanov isə sədr müavini seçiliblər.