Tokio, 4 noyabr (AZƏRTAC). Tokioda keçirilən 58-ci Beynəlxalq Yoşinkan Aykido festivalında Azərbaycan da iştirak edir. Bu, ölkəmizin festivalda ilk təmsilçiliyidir. Bu mötəbər turnirdə Azərbaycanı şidoşiya dərəcəli Atil Ağamirov və birinci dan qara kəmər Ülvi Ağamirov təmsil edirlər.

Yoşinkan Aykido Yaponiya ilə yanaşı, ABŞ, Kanada, Bolqarıstan, Filippin və digər ölkələrdə də populyar idman növü sayılır və onunla əsasən, hüquq mühafizə orqanlarının əməkdaşları məşğul olurlar.

Festival Yoşinkan Aykido üzrə müxtəlif məktəblərin nümayəndələrinin nümunəvi çıxışları ilə başlamışdır. Azərbaycan idmançıları bıçaqla hücumdan müdafiə fəndlərini nümayiş etdirmişlər. İdmançılarımızın çıxışı tamaşaçıların alqışları ilə qarşılanmış, münsiflər heyəti tərəfindən yüksək qiymətləndirilmişdir.

Festivalın münsiflər heyətinin üzvü, səkkizinci dan qara kəmər Tsuneo Ando AZƏRTAC-ın Yaponiyadakı xüsusi müxbirinə demişdir ki, Azərbaycan idmançılarının bu beynəlxalq turnirə qatılması sevindiricidir: “Mən ötən il Azərbaycanda təşkil olunmuş turnirdə iştirak edərək idmançılarınıza təlimlər keçmişəm. Sizin gənclərin bu idman növünə maraq göstərməsi çox yaxşıdır. Bakıda olarkən mən ölkənizin rəhbərliyinin idmana böyük qayğı və diqqətinin də şahidi oldum. Azərbaycanda böyük idman qurğularının inşası, idmançıların hər cür qayğı və diqqətlə əhatə olunması gənclərinizin sağlam böyüməsinə mühüm təsir göstərir. Biz Azərbaycandakı Buryukan məktəbinin nümayəndələrinin ilk dəfə Yoşinkan Aykido festivalına qatılmasına çox şadıq və onlara uğurlar arzulayırıq”.

Yoşinkan Aykido üzrə şidoşiya dərəcəli Atil Ağamirov da bu beynəlxalq turnirə qatılmaqdan məmnun olduqlarını bildirərək demişdir: “Çıxışımızın münsiflər heyəti və tamaşaçılar tərəfindən yüksək qiymətləndirilməsi bizi çox sevindirdi. Nəzərə alsaq ki, münsiflər heyətinin tərkibində Yoşinkan Aykido üzrə tanınmış idman ustaları var, bu, həqiqətən də böyük uğurdur. Festivala qatılmaqda məqsədimiz ölkəmizdə yeni yaranmış bu idman növünün inkişaf etdirilməsinə töhfə verməkdir. Biz gələcək festivallarda da Azərbaycan idmançılarının iştirakını təmin etməyə çalışacağıq”.

İyirmi gün davam edəcək festival çərçivəsində idmançılarımız təlim və seminarlara qatılacaq, yeni dərəcə almaq üçün imtahan verəcəklər.

Vüqar Ağayev

AZƏRTAC-ın xüsusi müxbiri

Tokio