YAQUB MƏMMƏD OĞLU MƏMMƏDOV
Azərbaycan musiqi mədəniyyətinə ağır itki üz vermişdir. Muğam sənətinin görkəmli nümayəndəsi xalq artisti Yaqub Məmməd oğlu Məmmədov 2002-ci il iyulun 5-də ömrünün 73-cü ilində vəfat etmişdir.
Yaqub Məmmədov 1930-cu ildə Ağcabədi rayonunun Xəlfərəddin kəndində anadan olmuşdur. Əmək fəaliyyətinə 1949-cu ildə başlayan Yaqub Məmmədov öz nadir istedadı və zəhmətsevərliyi sayəsində qısa müddət ərzində mahir müğənni kimi tanınmış, dinləyicilərin böyük məhəbbətini qazanmışdır. Müxtəlif illərdə Azərbaycan Dövlət Filarmoniyasında və Azərbaycan Dövlət Konsert Birliyində çalışan sənətkar Cabbar Qaryağdıoğlu, Xan Şuşinski, Seyid Şuşinski kimi qüdrətli sənətkarların layiqli davamçısına çevrilmiş və ömrünün sonuna qədər klassik muğam ifaçılığı sənətinə sadiq qalmışdır.
Azərbaycan xalq musiqisinin incəliklərini dərindən bilən Yaqub Məmmədov özünəməxsus ifa üslubu ilə milli musiqi xəzinəmizi zənginləşdirmiş böyük sənətkarlardan olmuşdur. O, dərin tarixi kökləri, zəngin ənənələri olan Azərbaycan xanəndəlik məktəbində layiqli yer tutaraq, onun inkişafına öz töhfəsini vermişdir. Muğam ifaçılığı ənənələrini, Azərbaycan xalq musiqisinin saflığını qoruyub saxlamaq və onu inkişaf etdirmək Yaqub Məmmədovun yaradıcılığının, yarıməsrlik sənət yolunun başlıca qayəsi olmuşdur. Ecazkar səsi, təkrarolunmaz ifaçılığı, dinləyicinin daxili aləminə nüfuz etmək, onda güclü emosional təsir yaratmaq bacarığı xanəndəyə muğam biliciləri arasında böyük hörmət və nüfuz, musiqisevərlərin dərin məhəbbətini qazandırmışdır. Onun ifasında səslənmiş bir çox muğamlar musiqi mədəniyyətimizin qızıl fonduna həmişəlik daxil olmuşdur. Yaqub Məmmədovun Vətənə, xalqa yorulmadan xidməti, milli musiqimizə hədsiz sədaqətlə səciyyələnən yaradıcılıq yolu gənc xanəndələr nəsli üçün tükənməz mənbə, böyük sənət məktəbi olmuşdur. O, muğam ustası kimi topladığı zəngin təcrübədən istifadə edərək, istedadlı ifaçıların yeni nəslinin yetişdirilməsi üçün bütün səy və bacarığını sərf etmişdir.
Azərbaycan muğam məktəbinin ustadlarından olan Yaqub Məmmədov milli mədəniyyətimizi dəfələrlə xarici ölkələrdə böyük məharətlə təmsil etmiş, Azərbaycan xalq musiqisini müxtəlif xalqların nümayəndələrinə sevdirə bilmişdir.
Milli musiqi mədəniyyəti sahəsində nailiyyətlərinə görə Yaqub Məmmədov xalq artisti fəxri adına layiq görülmüş, Azərbaycan Respublikasının ali mükafatı - “Şöhrət” ordeni ilə təltif edilmişdir. O, Azərbaycan Respublikası Prezidentinin fərdi təqaüdünə layiq görülmüş ilk muğam ifaçılarından olmuşdur.
Böyük xanəndə, vətənpərvər sənətkar və təvazökar insan Yaqub Məmmədovun əziz xatirəsi xalqımızın qəlbində həmişə yaşayacaqdır.
Allah rəhmət eləsin!
Heydər Əliyev, Murtuz Ələsgərov,
Artur Rasizadə, Ramiz Mehdiyev,
Elçin Əfəndiyev, Hacıbala Abutalıbov,
Fatma Abdullazadə, Polad Bülbüloğlu,
Nizami Xudiyev, Anar Rzayev,
Vasif Adıgözəlov, Zeynəb Xanlarova,
Sara Qədimova, Tükəzban İsmayılova,
Əlibaba Məmmədov, Qədir Rüstəmov,
Arif Babayev, Alim Qasımov,
İslam Rzayev, Canəli Əkbərov
X X X
Mərhumun cənazəsi vidalaşmaq üçün 2002-ci il iyulun 7-də saat 15-dən 17-dək Rəşid Behbudov adına Dövlət Mahnı Teatrının binasında qoyulacaqdır (Rəşid Behbudov küçəsi, 12).
Bölmənin digər xəbərləri
